DILI, STLNEWS.co – Prezidente Komisaun Reguladora Artes Marsiais (KRAM), Fernando Antonio da Costa ‘Lakinawa’ hateten, membru husi grupu arte marsiais ho arte rituais labele utiliza atributu hodi tuir kampanha ba partidu politiku.
Prezidente KRAM, Fernando Antonio da Costa ‘Lakinawa” hatoo preokupasaun hirak nee ba jornalista sira, bainhira remata enkontru ho PNTL iha Komando Jeral Kaikoli, Dili, Tersa nee (11/04/2023).
Nia dehan, enkontru ida ohin nee kordenasaun ida liga ho atividades neebe sei halo tuir mai nee. Atividades sira neebe ho fiskalizasaun ba ramu sira, depois mos lansamentu ba apoiu fundu no deklarasaun dame organizasaun artemarsiais sira nian.
“Liga ho atributu buat sira nee hotu, agora dadauk tuir lei, imi hatene sira hotu legal ona, signifika atributu sira nee, sira bele uja, maibe labele uja ba partidu politiku,” dehan nia.
Nia hateten, sira bele uja, signifika lei fo dalan ona, maibe fo atensaun nafatin, tanba iha histroia pasadu neebe maka la dun diak liga ho provokasaun sira liu husi atributu sira. Aleinde husu konaba sansaun saida maka sei fo, bainhira membru sira utiliza farda hodi tuir kampanha.
Prezidente KRAM nee esplika, bainbain nee presiza halo investigasaun, primeiru tenki identifika ema nee uza, tanba nia treina mak nia uza ka, ida nee nia primu ka alin gosta faru nee mak nia hatais, entaun tenki investiga hodi hatene lo-loos mak nee ka lae.
“Se lo-loos mak nee dunik, no kauza problema, entaun ita tenki tutan ba haree nia treina iha neebe, nia ramu iha neebe, nia organizasaun neebe, depois ita sei haree prosesu oinsa maka bele fo kontrolu ba sira,” dehan nia.
Nia konta, iha fatin publiku, kualquer fatin publiku ba momentu sira nunee, husu atu labele, lai tanba iha histroia sira liga ho provokasaun neebe sempre mosu.
Iha fatin hanesan, Segundu Komandante Jeral PNTL, Komisariu Jeral Pedro Belo haktuir, ohin reuniaun ida nee, hanesan reuniaun kontinuasaun ida neebe maka Komandante Jeral ho prezidente KRAM, maka halo tiha ona iha dia 30 liu ba, depois nia kontinuasaun mak iha ohin dia 11 nee, atu kontinua hodi organiza sira husi lideransa arte marsiais hotu, neebe maka hatene rejistu iha hamutuk 17, maibe ohin rua maka la parttisipa, I 15 partisipa.
Ho reuniaun ida nee para oinsa sira mos halo servisu hamutuk ho Polisia Nasional Timor Leste (PNTL), tanba ema hotu hatene katak iha programa prioriedade neebe mak importante tebes husi komandante jeral, sira nain rua nia programa iha pontus Lima neebe maka atu mantein, hametin pas no seguransa iha rai laran.
Entaun ida ne importante tebes atu involve ema hotu neebe maka partisipa, para atu bele halo tuir, tanba ema hotu hatene katak, Arte marsiais hotu neebe mak iha nee, joven barak liu mak hamahan aan iha neeba, entaun sira iha lideransa arte marsiais nee importante, para oinsa sira mos halo disiplina ba nia membru sira, no sira mos oinsa fo sansaun ba nia membru sira kuandu sira halo sala.
“Tanba nee mak hanesan ohin ita mos iha reuniaun ida nee mos oinsa sira nia servisu hamutuk ba iha kampana neebe maka besik dadauk ona, tanba sei halao iha dia 19 agora, para sira mos bele servisu hamutuk, tur hakmatek para labele halo problema iha komunidade nia leet, sira mos labele iha problema,” dehan nia.
(jen)
