Analfabetu Oan Sai Doutoramentu

DILI, STLNEWS.co Maluk letores sira, serimonia Solene Graduasaun Dili Institute of Technology (DIT) ba dala XIV periodu tinan 2021, konvida ita atu konese analfabetu oan husi area rurais Tei’Nae Aldeia Bonemese, Suku Naimeco, Postu Administrativu Pantemacassar Rejiaun Administrativu Espesial Oecusse, konsege sai doutoramentu ho susesu.

Analfabetu Cipriano Sau no Lucia Anuno/felicada nia oan mane dahuluk ho naran kompletu mak Dr. Joao Muni, MM, moris iha Bonemese, Bairru Tei’Nae, Suku Naimeco-Oecusse, iha loron 20 fulan Novembru tinan 1969.

Dr. Joao Muni nia karier servisu hanesan mestri no dosente tinan 1995 iha Dili. Husi tinan 1995-1997 hanesan mestri iha Escola Secundaria Curacao de Jesus Becora no Darma Bakti Dili. Iha periodu hanesan dosente no Koordenador Biblioteka Universidade de Timor Timur (UNTIM), hanorin sujetu Sosiolojia, Sosiolojia Rural no Urbana i Metodolojia Peskiza.

Iha tinan 1997-1999 servisu hanesan funsionariu publika Indonezia iha Diresaun Edukasaun Distritu Bobonaro nian. Iha tinan 2002 servisu ba Staf UNDP Oecusse, hanesan ‘Political Apoinment’ ba Partidu Politiku sira iha Eleisaun Asembleia Konstitusional. Iha tinan 2002-2003 servisu hanesan koordenador servisu humanitaria iha ‘German Agro Action’ suporta distribuisaun komunitaria, prepara fasilidades emerjensia ba eskolas hanesan meza-kadeira, fornese irigasaun ba komunitariu agrikultor sira no asistensia ai-han.

Iha fulan Maiu tinan 2002, loke Eskola Ensino Secundaria Baqui – Oecusse nuudar Diretor, iha periodu hanesan mos loke DIT Kampus Rejional Oecusse. Tuir mai sei esplika kompletu. Bainhira sei eskola iha ensinu basika Naimeco transporte sae kuda ho distansia 25 km. Inspirasaun nebe motiva atu eskola to’o nivel aas atu sai camat, no ikus mai sai mestre ka profesor hahu husi profesor sekundaria no agora hanesan profesor universitaria ka dosente.

Hau nia aman-inan (Cipriano Sau no Lucia Anuno/felicada). Oan dahuluk husi maun alin nain 5 (Joao Muni, Juliana Muni, Batista Muni/felicio, Mario Muni no Xisto Muni). Hau kaben ho Maria Magdalena Suranti (Klaten, Jawa Tengah-Indonesia). Oan nain rua (2) Seraphine Letizia Rozary Eka Salu Putri no Zebedeo Antonio Spinola Salu Putra. Oan feto hasai nia Lisensiatura Akuntabilidade iha Sekolah Tinggi Ilmu Ekonomia Yogyakarta-YKPN no Mastrada iha Jestaun Financa (Teze) iha Universidade Atma Jaya Yogyakarta-Indonesia.

Oan Mane estuda Teknik Otomotif iha Sekolah Tinggi Perindustrian-STP AKPRIND Yogyakarta-Indonesia. Profisaun informal hanesan natar nain no hakiak animal (karau, fahi, no bibi) hanesan talentu husi inan-aman agrikultor no animal atan.

Bainhira dada lia ho STL iha ninia rezidensia, Surik Mas,  Sabadu (27/11/2021) konfesa katak, iha era independensia, inisiu hanesan dosente iha DIT Kampus Rejional Enclave Oecusse (DITKREO), aumezmu tempu hanesan staf dosente no administrasaun, toma responsabilidade konaba adademika ninian. Progresu dezenvolvimentu DITKREO ninian hahu iha tinan 2010, hetan fiar hanesan Diretor DITKREO, mezmu tempu iha neeba hadia buat balu, oinsa prepara DITKREO hetan akreditasaun nomos hadia DITKREO hanesan aset iha Oecusse tomak.

“Ho situasaun ida nee hau promove DITKREO, sai hanesan simbolu ida katak, aset ba Oecusse tomak, tanba nee, hau foku ba oinsa hadia administrasaun iha DITKREO no programa, neebe hau trasa maka promove staf dosente potensial sira atu kontinua sira nia estudu iha nivel aas liu, hanesan mastradu ba dosente nain lima (5), nunee sira hetan valor ho finaliza sira nia estudu iha nivel mestradu iha Indonezia, liu – liu Universidade Admajaya no UKSW,” dehan nia.

Iha tempu neeba, hafoin akaba husi knaar Diretor DITKREO, hetan fiar atu kontinua estudu iha doutoramentu.

“Tanba nee, hahu iha tinan 2015 to’o 2020, hau hetan fiar husi DIT atu kontinua estudu doutoramentu iha area Public Administration, nee duni estudu ida nee hau remata ho diak no konsege halo hau nia teze. Hau hanoin katak, rekursu umanu sai fator importante atu dezenvolve mundu akademiku, liu – liu iha DITKREO, mais hafoin fila husi estudu doutoramentu, hetan knaar iha kampus Central DIT ninian, primeiru hanesan dosentes iha School of Business and Management, hanesan Xefe Departementu Jestaun jeral ninian, halo merger hamutuk, hanesan marketing management, Human Resource management, Agro Comersiu no public policy Management.

Prepara kurríkulu ida nee, hau uza dadaun ona no entrega ba kolega sira balu no hau sai hanesan dosente senior iha Departementu School of Bisnis Management and Administration (MBA) no nafatin hanorin iha Departementu Jestaun Jeral ninian, finance management nomos acountabilidade ninian.

Antes asume knaar hanesan dosente, uluk hanesan funsionariu publiku iha Depatmentu Ekonomia iha Ministeriu Ekonomia servisu iha centru Dezenvolvimentu Emprezariu Oecusse (CDE) hanesan Gestor Oecusse, foka liu ba area treinamentu professional ba emprezariu sira, oinsa sira bele hatene buka idea bisnis.

Iha tempu independensia, hau servisu hanesan funsionáriu, ONG tanba situasaun emerjensia, ita laiha servisu neebe hau servisu monta gabiaun ka bronjong iha mota ninin sira, hada fatuk barajen, halo servisu badaen nian hanesan deker oan sira iha komunidade nia leet iha area konstrusaun nomos fahe sasan umanitaria, mina goreng, fore ba komunidade sira iha momentu neeba. Situasaun ida nee, hau la hanoin ona nivel edukasaun neebe hau hetan, maibe oinsa atu sustenta ita nia moris, liu-liu moris familia ninian.

Iha tinan 2002, Sr. Jose Anuno, Sr. Stanislao Saldanha, Sr. Joao Cancio, buka dalan harii instituisaun ka universidade naran DIT, hau mos la involve iha diskusaun sira nee, maibe sira temi hau nia naran katak, iha posibilidade tama ekipa ida nee, neebe la hatene hau fundador ka la fundador, maibe hau nudar staf iha momentu neeba, sira fiar hau atu sai hanesan staf administrasaun akademika, rejistu estudante foun DITKREO, prepara dokumentus para prosesu aprendizajen iha Oecusse tempu neeba.

Iha momentu neeba, hanesan funsionariu iha Departementu Ekonomia Dezenvolvimentu, ho knaar jestor iha Centro Dezenvolvimentu Emprezarial (CDE). Situasaun ida nee maka hau halo, dader iha oras servisu ofisial, loraik kontinua iha DITKREO.

Alende nee mos Intelektuais sira ezije hamoris fali eskola secundaria ida iha Suku Naimeco, Aldeia Baki iha tinan 2002, tanba nee kontinua fahe tan hau nia tempu, dader servisu ofisial, meudia sai jerente ka diretor iha SMA Baki no loraik kontinua fali hanesan funsionariu CDE no husi tuku 5:00 loraik to’o tuku 8:00 kalan, halao knaar hanesan staf DIT, loron ida halao knaar tolu dala ida, maibe buat hotu lao diak.

Situasaun ida nee, hau bele fiar katak, ita servisu makaas iha loron ida, ita sei hetan buat ida neebe maka diak, tanba nee iha tinan 2008, hau hetan fiar husi DIT atu ba kontinua hau nia estudu Maestradu iha UGM iha area Public Administration, nunee remata iha tinan 2010.

Hafoin remata estudu, fila mai Timor no kontinua halao knaar hanesan Funsionariu CDE iha Oecusse, nunee iha momentu neeba tenke determina hau nia futuru, hau tenke hili servisu tanba iha momentu neeba husi Ministeriu Ekonomia tawarkan buat barak mai hau, tanba nee osan neebe hau simu tenke fahe ba sanan tolu, hau nia oan sira eskola iha Indonezia, hau servisu iha Dili nomos hau nia kaben hela iha Oecusse, tanba nee situasaun difisil tebes, entaun iha fulan Jullu tinan 2010, hau rejignaan husi funsionariu publiku CDE no halao knaar tomak iha DITKREO.

Nee duni hau komesa servisu fokus, la servisu iha Eskola Secundaria no CDE, hau fokus deit ona iha DIT. Liu husi servisu fokus, konsege  halao serimonia solene graduasaun DIT iha Oecusse.

Nia rekonese katak, sei kiik la iha mehi atu hetan graun doutoramentu, tanba inan aman moris nuudar agrikultor iha knua izoladu iha Oecusse, iha Suku Naimeco, Aldeia Tei’Nae, laiha mehi iha nivel edukasaun neebe aas tebes hanesan dadaun nee.

“Hau agradese ba hau nia inan aman no familia sira hotu katak, iha situasaun seidauk iha informasaun konaba edukasaun neebe klean, fiar hau ba eskola, atu bele hetan edukasaun iha nivel ida neebe bele hakerek, lee nomos bele komunika ho ema. Dalan moris neebe naruk no susar tebes, tanba ita eskola iha knua lao ain kuaze 25 kilometrus atu hetan edukasaun bazika, depois husi neeba hau ba fali iha SMPK Santo Antonio Oecusse, sei kiik hela mesak, dook husi inan aman, hau hanoin, ida nee sai hanesan bukae ida katak, mental husi kiik, trasa ona atu bele hasoru moris ida nee, difikuldade iha parte ekonomia ninian, inan aman la hatene buka osan, tanba sira la eskola, maske sira iha riku soin balun hanesan animal, maibe sira seidauk iha konesimentu konaba merkadu atu buka osan eskola sira nia oan nee,” haktuir nia.

Hafoin akaba SMP, hau hakat liu mai iha Dili, tanba iha momentu neeba, tinan 1987, seidauk iha eskola sekundaria iha Oecusse, hau koko kontinua estuda iha Dili, entaun inan aman mos aseita ho inisiativa ida nee, hodi kontinua hau nia estudu.

Familia balun husi hau nian, hakarak atu hau tama eskola seminariu, tanba eskola ida neebe fo matenek diak liu, maibe inan aman la aseita no haruka hau eskola sekundariu iha Dili, Sao Jose. Iha tempu neeba, primeiru Ano sekundaria ninian, hetan fiar husi profesores sira tanba iha komportamentu diak, performance diak, valor naton hetan bolsu estudu kontinua eskola secundaria segundu ano no terseiru ano iha Jogjakarta-Indonezia.

Husi situasaun ida nee, governador Timor-Timur ninian, liu- liu desizaun matebian, Eng. Mario Viegas Carascalao hateten, iha ninia vizita iha Jogjakarta momentu neeba katak, Timor oan sira neebe maka eskola iha eskola sekundaria iha Jawa-Indonesia, hetan oportunidade bolsu estudu iha universidade.

Informasaun nee, motiva hau atu prepra aan kompete iha teste tama universidade iha Idonezia, entaun hau tuir teste iha Universidade Gajah Mada pasa, tanba nee ho grasa Maromak maske iha momentu neeba osan laiha, sorte boot impresta osan ho montante RP.15.000, tau naran iha universidade. Ho ida nee hau agradese ba Governador Timor Timur, Eng. Mario Viegas Carascalao, tanba hau kontinua eskola iha ensino superior iha UGM Indonezia, foti departementu Sosiolojia no konsege akaba hau nia estudu iha tinan 1995.

(Joseph Koa)

LEAVE A REPLY

Please enter your comment!
Please enter your name here

NEWS UPDATE

SEJD Ho Governu Australia Diskuti Dezenvolvimentu Juventude & Desportu

DILI, STLNEWS.co - Sekretariu Estadu Juventude no Desportu (SEJD) hamutuk ho Embaixador Australia ba Timor Leste, halo diskusaun oinsa atu dezenvolve seitor juventude no...

Gasta Orsamentu Boot, Roo Haksolok Sei Iha Inserteza

DILI, STLNEWS.co - Too oras nee roo Haksolok sei iha inserteza atu mai iha Timor-Leste, maski gasta ona orsamentu povu nian ho montante neebé...

Adelino Pineira Rai Henek Sustenta Familia

DILI, STLNEWS.co - Adelino Vila Nova ho idade 35, husi Munisipiu Ermera informa, liu husi pineira rai henek mak dalan diak hodi hetan osan...