Atividade Ensinu Laiha; Estranjeirus Kontinua Tama TL

Dekanu Fakuldade Siensia Sosiais UNTL, Camilio Ximenes Almeida. (Foto: STL/Jacinta Sequeira)

DILI, STLNEWS.co – Iha ambitu implementasaun serka sanitaria, atividades ensinu superior too ensinu baziku laiha, nunee mos povu lahalo movimentu ba-mai, maibe ema estranjeirus kontinua tama Timor Leste (TL).

Kestaun nee hatoo husi, Dekanu Fakuldade Siensia Sosiais UNTL, Camilio Ximenes Almeida, ba STL liu husi telefone, Segunda (15/03/2021).

Nia dehan, ho implementasaun serka sanitaria nee, povu iha rai laran labele halo movimentu, maibe ema estranjeirus sei kontinua tama iha TL hanesan bai-bain.

“Ami iha universidade atividades laiha, nomos ensinu baziku sira hotu mos laiha ida, maibe governu fo oportunidade ba ema estranjeirus sira tama sai hanesan bai-bain,” dehan nia.

Nia dehan, tuir relatoriu husi Koordenador Covid-19 dehan, numeru kazu pozitivu aumenta ba bebeik deit, liu-liu iha kapital Dili nomos Baucau, maibe la hatene progresu durante semana ida too iha neebe, maibe saude sira dehan, kazu pozitivu kontinua sei aumenta, se akompania mundu too agora, tanba seidauk iha nasaun ida mak deklara Covid-19 laiha ona.

“Laiha dalan seluk ba nasaun sira iha mundu inklui iha TL, diak liu deside moris hamutuk ho Covid-19, too bainhira mak distinu too hanesan muzika Chico Maulohi nian, bainhira mate hotu ona, ida nee mak ita presiza haree,” nia dehan.

Camilio sublina, agora kazu pozitivu kada loron sempre aumenta, maibe sidadaun estranjeirus sei kontinua tama nafatin mai TL, iha rai laran atividades eskola laiha, hahu husi universidade mai too ensinu baziku nee laiha.*

Reportajen: Jacinta Sequeira/Blandina Mauno
Editora: Carme Ximenes

LEAVE A REPLY

Please enter your comment!
Please enter your name here