DIT Gradua Finalista 354 Inklui MBA Nain 6

DILI, STLNEWS.co Dili Institute of Tecnhology (DIT) Segunda nee (29/11/2021) halao serimonia graduasaun ba dala XIV periodu tinan 2021, ho graduadus hamutuk ema nain atus tolu lima nulu resin haat (354) inklui Master Of Business Administration (MBA) ema nain 6. Graduadu sira simu sira nia titulu akademika hanesan Bacharelatu  ho Lisensiatura no MBA.

Graduadu sira nee mai husi School of Engineering and Science (ema nain 115), School of Petroleum Studies (ema nain 61), School of Business and Management ((ema nain 57), School of Tourism and Hospitality (ema nain 116), ho Programa Pos Graduasaun Master of Business Administration (ema nain 6).

Serimonia graduasaun DIT ba dala XIV periodu tinan 2021 ho tema “Papel Ensinu Superior Hodi Dezenvolve Rekursu Umanu Ba Kresimentu Ekonomia Ho Sustentabilidade Ekonomia Timor” halao iha knua DIT. Serimonia graduasaun hahu iha horas 08:00 to’o remata, partisipa inan aman husi graduadus atus tolu lima nulu resin haat (354), neebe mai husi 12 munisipiu inklui RAEOA. Ministru Edukasaun Ensinu Superior no Kultura, Longuinhos dos Santos mos marka prezensa iha serimonia nee.

Serimonia graduasaun hahu ho entrada graduadus sira iha resintu serimonial (Muzika Foin Sae Timor), Entrada Senadu Akademiku (Muzika Gaudianus), Inu Nasional Patria-Patria no tuir kedas ho orasaun neebe prezide husi Pe. Guilhermino, neebe hanesan mos graduadu Master Of Business Administration (MBA).

 Antes realiza serimonia graduasaun nee, familia boot DIT halao misa agradesimentu neebe prezidi husi Pe. Angelo Salsinha akompana husi Pe. Joao Soares no Pe. Santiago.

Reitor DIT, Alvaro Menezes Amaral, PhD hatete, graduasaun nee hanesan festa boot ida husi estudante sira neebe konklui sira nia estudu, depois sira halao prosesu apredizajen iha tinan hirak nia laran. Numeru graduadus tinan nee hamutuk ema nain atus tolu lima nulu resin haat (354).    

Nia dehan, tinan ida nee Timor Leste (TL) kontinua hasoru situasaun difisil oin – oin. Pandemia Covid 19 sei kontinua sai preokupasaun boot iha mundu. Iha fulan Marsu to’o Augusto liu ba situasaun Covid 19 obriga ema hotu hela iha uma, estudante hotu – hotu aprende liu husi online. “Situasaun ida nee obriga inan – aman sira tenke sér sosa pulsa, smartphone ho laptop ba oan sira. Situasaun Covid-19 nee mos lori implikasaun boot ba setor ekonomia iha ita nia rain, traballador Timoroan barak mak lakon servisu. Situasaun nee halo ita laran triste. Maibe husi media internasional sira katak, vasina tolu ka haat tama ona iha faze final, ida nee lori optimizmu mai ita konaba ita nia futuru,” dehan Reitor Alvaro.

Reitor mos hato’o dezenvolvimentu nebe DIT hahu tiha ona no kontinua halo hanesan, Publikasaun Artigu Sientifiku. DIT Kontinua publika Artigu Sientifiku iha plataforma repozitoriu Timor Leste Journal of Business & Management (TLJBM), hodi halo publikasaun ba artigu sientifiku iha area economy ho social science. Iha journal nee, publika ona hamutuk volume 3 ho artigu sientifiku hamutuk 20. Repozitoriu Timor Leste Journal of Engineering & Science iha volume 2 ho artigu sientifiku hamutuk 10.

Progresu seluk mak konaba rekursu pesoal. Reitor Alvaro esplika katak, agora dadaun DIT iha ona funsionariu permanente hamutuk atus ida ualu nulu resin tolu (183). Husi numeru nee, dosente permanente hamutuk atus ida tolu nulu resin lima (135), neebe kompostu husi doutoradu ka PhD hamutuk 18, kandidatu doutor hamutuk 3 no sira seluk ho nivel mestradu.

DIT mos hetan Akreditasaun Programatiku ba Programa Estudu MBA ho Akreditasaun Institusional ba DIT rasik nuudar Instituisaun Ensino Superior. Nia dehan, programa mestradu ka Pos Graduasaun Master of Business Administration primeiru, segundu, i terseiru turnu ramata sira nia estudu. “Estudante MBA neebe gradua ohin, hamutuk ema nain 6,” katak Magnifiku Reitor Alvaro.

Liu husi politika Ministeriu Ensinu Superior Siensia no Kultura neebe dezafia Ensinu Superior iha Timor Leste, atu barani hahu loke programa doutoramentu mak tinan oin, DIT sei hato’o proposta ba ministeriu ho ANAAA hodi hahu loke programa odutoramentu ka PhD DIT nian iha area jestaun no komersiu.

Konaba fasilidade, Reitor Alvaro hatete katak, iha tinan ida nee DIT hahu konstrusaun ba edifisiu andar 5. Espera prosesu konstrusaun sei ramata iha tinan oin. Ho edifisiu foun nee sei fo espasu neebe adekuadu atu fornese atividade ensinu no aprendizajen diak liu tan ba estudante DIT nian.

DIT mos kontinua kampana hodi promove boa governasaun hodi proteze intereses inan – aman nian no publiku ba kualidade ensinu no aprendizajen. Nunee, fiar neebe publiku no inan – aman sira tau mai iha DIT bele nakfilak ba rezultadu neebe diak no kualidade duni.

Nia mos dehan katak, tinan 2 liu ba DIT estabelese ona programa pos graduasaun Master of Business Administration, i agora dadaun lao diak tebes. Haree ba rekursu dosente DIT ho fasilidade neebe iha, tinan oin, DIT mos sei hahu loke programa doutoramentu i sei submete dokumentus ba Ajénsia Nasional ba Avalíasaun no Akreditasaun Akadémika (ANAAA).

DIT mos kontinua kampanha hodi promove boa governasaun hodi proteze intereses inan-aman nian no publiku ba kualidade ensinu no aprendijazen. Nunee, fiar neebe publiku no inan-aman sira tau mai iha DIT bele nakfilak ba rezultadu neebe diak no kualidade duni.

Tuir Reitor Alvaro,  Tinan 2020 mos nuudar tinan ikus jornada DIT nian ba vizaun 2004-2020 ho planu estratejiku dokumentus Maubara, planu estratejiku dokumentus Oekusi, ho planu estratejiku dokumentus Ramelau. Tinan ida nee, DIT hahu ho Vizaun no Misaun foun 2021-2050, hahu ho Planu Estratejiku 2021-2025 dokumentus Joao Paul Segundo.

Reitor Alvaro hatoo lia menon ba graduadu no inan-aman sira katak agora dadaun graduadu sira iha odamatan mundu nian. “Imi lao ba,  matenek iha ona imi nia ulun, lao ba halo istoria iha mundu. Atu nunee, lori ita nia rai, hasae ita nia rai nia degnidade hanesan mos ho rai seluk, aas mos hanesan rai seluk, lao ho orguillu, lao ho esperitu, hanesan mos ho ita nia heroi sira, ita nia mate restu sira neebe mate namkari, buka la hetan, maibe sira mehi maka nee, sira nia oan, bee oan tenke lori ita nia rai, dignifika ita nia rai nee liu husi matenek, tanba liu husi matenek maka ita bele kompete. Lao ba, sai embaixador neebe diak ba iha DIT, hatudu ba publiku katak DIT laos boot iha naran deit, maibe boot iha kualidade,” tenik Alvaro.

Reitor mos husu ba graduadus sira atu iha mehi neebe boot, uza matenek hodi serbii, hodi halo kreatividade ho inovasaun, hodi halo transformasaun ba familia, kolega no transforma ba nasaun. “Imi agora sai ona embaxador perfeitu DIT nian ba komunidade. Tanba nee, hatudu ba katak DIT laos boot deit iha naran maibe nia graduadus mos iha kualidade atu kontribui ba dezenvolvimentu ita nia rain,” katak Reitor Alvaro.

Ba inan-aman sira, Reitor Alvaro husu atu  fiar nafatin ba DIT. “Liu husi imi nia fiar, ami tane iha ami nia kabas, nunka tau iha rai. Ami sei proteze inan-aman sira nia interese, ami sei proteze publiku nia interese ba iha kualidade edukasaun, tanba nee haruka nafatin imi nia oan sira mai iha DIT, atu nunee DIT bele prepara kondisaun iha prosesu aprendizajen neebe iha ho kualidade, ba iha investimentu neebe iha kualidade, ninia retornu nee sertu, prepara sira ho kompetitivu iha sira nia kompetensia, atu nunee sira bele involve direita iha prosesu dezenvolvimentu e konstrusaun iha ita nia rai,” katak Reitor Alvaro.

Relasiona ho progresu DIT nian, Reitor Alvaro hatoo apresiasaun nebee aas no obrigadu wain ba: Governu Timor-Leste, liu husi Ministeriu Ensinu Superior, Siensia no Kultura, ANAAA, Ministeriu Saude, the University of Western Australia, Victoria University, Australia, Universitas Udayana, Australian Volunteer International (AVI), Volunteers Service Abroad (VSA), New Zealand, Engineers Without Borders, MPRM, INAP, ANP, Timor-Gap EP, Conoco-Phillps, Slumberger, Bank Mandiri, BNCTL, KIESPTL no seluk tan nebe nia labele temi ida-ida nebee sai parseria diak ba DIT.

“Hau mos hato’o agradese wain ba inan-aman graduadu sira nebee fo fiar ba DIT hodi eduka imi nia oan sira. Mos hatoo obrigadu wain ba sivitas akademika DIT hotu ba imi nian vontade diak, komitimentu makas ho servisu la kolen no solidu hodi lori DIT too hetan naran diak iha sosiedade ho industria,” katak nia.

(mik/koa)

LEAVE A REPLY

Please enter your comment!
Please enter your name here

NEWS UPDATE

Atletizmu Realiza Kampionatu Nasional

DILI, STLNEWS.co – Federasaun Atletizmu Timor Leste realiza kampionatu nasional, ho objetivu hodi halo selesaun ba atleta sira neebe mak atu partisipa iha kompetisaun Sea...

Suku 4 Iha Munsipiu Aileu Seidauk Asesu Eletrisidade

DILI, STLNEWS.co – To'o oras nee suku 4 iha Munisipiu Aileu, kompostu husi aldeia 31 seidauk asesu eletrisidade, tanba nee sente hanesan diskriminasaun ba populasaun. Informa...

TL Presiza PR Iha Maturidade No Matenek

DILI, STLNEWS.co – Loron 19 fulan Marsu sei hala'o eleisaun prezidensial, tanba nee Timor Leste (TL) presiza Prezidente Republika (PR) neebe maturidade no matenek. Tuir...