Dosente Prepara Materia Lian Tetum-Portugues

Reitor UNPAZ, Adolmando Soares Amaral. (Foto: Espesial)

DILI, STLNEWS.co – Dosente sira iha Universidade da Paz (UNPAZ), antes halao prosesu aprendizajen ba estudantes, prepara uluk materia ho lian Tetum no Portugues.

“Ami halo mudansa lian iha universidade, liu-liu ba prosesu aprendizajen nee ami husu ba dosente sira, atu bele prepara materia ho lian Tetun no Portugues, atu nunee dosente sira bele halo esplikasaun ho lian saida deit iha aula laran,” dehan Reitor UNPAZ, Adolmando Soares Amaral ba STL, hafoin halo enkontru ho Ministru Ensinu Superior, Siensia, no Kultura (MESSK), Longuinhos dos Santos iha edifisiu MESSK Colmera, Dili, Sabadu (03/04/2021).

Nia dehan, dadaun nee dosente iha UNPAZ rasik hamutuk quatru sentus e onze pesoas, nee ho grau lisensiatura, mastradu, no doutoramentu, maibe lisensiatura nee la too ona 10, restu nee mastradu no doutoramentu.

Iha fatin hanesan, Reitor ISC, Sebastião Pereira hatete, minimu nee lisensiatura, mastradu mak bele hanorin, tanba sistema aprendizajen iha ensinu superior nee, nivel ida tenke liu husi estudante sira iha universidade.

“Tuir ita nia konstituisaun da republika nee katak, lingua ofisial mak Tetum no Portugues, maibe lingua seluk nee sai hanesan lingua administrasaun. Hau hanoin agora dadaun nee ami nia dosentes balun sei tuir hela aulas iha Portugal, Indonezia, liu-liu ida neebe hanorin mastradu, tenke douramentu, nomos ida neebe mak lisensiatura, tenke mastradu sira mak hanorin sira,” dehan nia.*

Reportajen: Jacinta Sequeira/Blandina Mauno
Editora: Josefa Parada

LEAVE A REPLY

Please enter your comment!
Please enter your name here