Dr. Peregrinus D. Siga Taa, M. Eng: Kualidade Servisu Infrastrutura Publiku Fraku

DILI, STLNEWS.co – Dekanu Fakuldade Enjeñaria no Siensia Dili Institute of Technology (DIT), Dr. Peregrinus D. Siga Taa, M.Eng, hatete, kualidade servisu infrastrutura publiku sei fraku tebes – tebes, tanba kondisaun infrastrutura nebee iha dala barak sai hanesan preokupasaun no mosu duvidas barak husi komunidade sira.

“Ita persiza estuda husi problema (risku) nebe akonteste ona durante nee, bele hadia atu atinje nesesidades dezenvolvimentu nebe sustentável. Hanesan reflexaun ida ba ita, no futuru enjeñaria sira oinsa atu apoiu dezenvolvimentu no redus risku no falla infraestrutura iha TL, iha tempu agora no futuru,” dehan Dr.  Peregrinus D. Siga Taa bainhira hato’o nia diskursu iha serimonia Yudisium Departementu Civil Engineering  DIT iha  Salaun Esperansa Dili, Sabadu (27/11/2021).

Nia haktuir katak, dezenvolvimentu iha mundu global no mos iha TL sempre aumenta ba bebeik. TL hanesan pais nebee foin hahuu nia desenvolvimentu, sei presiza konstrusaun infrastruturas iha prósimas dékadas ba dezenvolvimentu nebee sustentável. Infrastruturas mak hanesan; infraestrutura ba estrada, ponte, portu, aeroportu, telekomunikasaun, infraestrutura ba irrigasaun agríkola, infraestrutura rezidensial, infraestrutura mineral (tambang) no infraestrutura petróleu no gás, inklui edifísius iha onshore no offshore.

Maibe ema barak haree liu konaba valores estétikus, ladun foo atensaun ba durasaun tempu infrastrutura ida bele aguenta todan, bainhira iha rai nakdoko no afetada husi mudansa klimatika. Iha TL, depois ukun aan too agora, problema kualidade infrastrutura nafatin sai nudar preokupasaun boot ba Timoroan tomak.

Povu Timor dala barak hakilar no media sira mos foo sai informasaun konaba estrada nebee aat, maske foin konstrui no uza seidauk kleur, inundasaun iha Dili laran, uma eskola balun didin hahu nakfera no la diak, irigasaun la funsiona, tembok penahan balun mos aat hamosu rai monu no seluk tan. Problema sira nee hatudu katak, kualidade servisu infrastrutura publiku fraku tebes-tebes. Kondisaun infrastrutura nebee iha dala barak sai hanesan preokupasaun no mosu duvidas barak husi komunidade sira.

“Hau hato’o Parabens baKandidatu Graduadu sira tanba bele finaliza prosesu aprendizajen iha DIT, lori tempu naruk lao trimestre pur trimestre (mai kuliah loron-loron, halo tugas mata kuliah oin-oin) to’o ikus hakerek Monografia/Skripsi dala ruma estudante sente todan (balun terseok-seok) atu finaliza hakerek no tuir ezame final, maibe ho imi nian esforsu no hakaas aan imi bele liu desafiu oin-oin. Nuudar imi nian maun dosente, hau hato’o parabens ba imi nian susesu, tanba bele hetan Diploma (Sarjana Teknik – Enjeñeiru) no Grau Akademiku B. Eng. (honors) in Civ. Eng,” nia haktuir.

Nia mos dehan katak, Grau Akademiku – Enjeñeiru ida nee hanesan faze inisiu husi faze ou etapa tuir mai iha imi nian jornada moris ba futuru. Imi sei tama iha mundu nebe lolos. Mundu nebe nakonu ho test/ezame, mundu nebe iha problema no dezafiu oin-oin. Durante nee nuudar estudante no sei hala’o estudu imi sente iha zona nyaman; imi bele husu, imi obriga no fo sala ba inan-aman sira, maibe agora ba oin imi tenke responsabilidade ba saida deit mak imi sei halo.

Iha tempu agora eziste teknolojia oin-oin nebee disponível atu uza hodi halo investigasaun jeotéknika, analiza hidrolojia, analiza forsa estrutura nee rasik hodi realiza karakterizasaun (site characterization) rai iha fatin nebee sei halo konstruksaun infrastruturas no estudu no analiza siensias oin-oin atu halo planu no ezekuta servisu ba kualidade diak. Servisu ida nee mak papel importante ba enjeñeiru sira husi Enjenharia Civil nian nebe durante nee imi hala’o estudu sai mos imi nia area estudu espesialidade (spesialisasi) durante imi estuda iha DIT.

Hanesan Tema Yudisium nebe hakerek iha banner oin : “CREATIVITY, INNOVATION AND SUCCESS”. Tema nebe Panitia halo nee, parese tanba refleta kondisaun nebe iha ligasaun ho problema real nebe ita hasoru. Agora dadauk iha hela pandemia Covid-19 foo impkatu mos aspeitu hotu inklui mos prosesu aprendizajen (inklui bimbingan monografia online). Maibe tanba ita iha kreatividade no inovasaun bele hetan duni resultadu ho susesu hanesan ita sente dadauk iha fatin ida nee.

Nia husu ba kandidatu graduadu sira atu uza sira nian konhesimentu no kapasidade nebe aprende ona durante hala’o estudu iha Departementu Enjeñaria Civil DIT atu halo kreatividade, halo inovasaun no fo solusaun ba preokupasaun povu Timor nian ba futuru nebe diak.

Nia mos hatete ba graduadu sira atu pasiénsia no forsa, labele baruk ten, labele fraku, purke depois de ida nee. “Imi nia papel la depende tan ba Inan-Aman, maibe imi nia papel sai importante no sai esperansa no tenke foo benefisiu ba imi nian Inan-Aman, familia no nasaun.  Ho Conquista/pencapaian ida nee ami dosente no Staff Fakuldade Enjeñaria no siénsia DIT tomak mos, sente orgullu ho imi nia susesu. Espera orgullu no felisidade ida nee bele kontinua nafatin iha futuru,” dehan nia.

Nia mos husu ba graduadu sira atu labele para atu aprende, recursos de aprendizajen la mai husi dosente deit, laos iha kampus deit, maibe problema iha vida moris nian, difikuldade iha vida moris nian, ambiente moris iha sosiedade mos hanesan fontes/ rekursus de aprendizajen ba graduadu sira nian susesu iha futuru.  Dosente sira sei suporta nafatin ho orasaun ba Aman Maromak atu imi bele susesu iha imi nian kareira, honestu no servisu ho responsabilidade.

“Ohin loron ikus ba imi nia jornada estudu iha nivel Universidade DIT no hetan grau lisensiatura/enjeñeiru ona. Hau fiar katak, ho konesimentu, kapasidade ho kualidade edukasaun no disiplina nebee imi hetan durante prosesu estudu iha DIT, bele lori mudansa nebee signifikativu ba imi nia familia, sosiedade no mos ba povu no nasaun TL. Tanba nee, la haluha hato’o hau nia votus parabens ba alin gradudus ho familia sira hotu,” tenik nia.

Ikus liu, nudar Dosente iha Departementu Enjañaria Civil DIT nebee hamutuk ho DIT  hahu husi tinan 2004 too agora, husu ba Kandidatu Graduadu sira atu labele haluhan ba institusaun / almamater ida nee. “Ami dosente sira sei prontu atu suporta nafatin liu husi imi asosiasaun alumni nian. No imi tenke prontu nafatin servi nasaun no povu TL hanesan DIT nia motto ”Matenek Hodi Servi”. Hau mos hato’o parabens no obrigado ba kandidatu Graduantes sira no inan Aman sira hotu nebe foo fiar no konfiansa ba Oan Sira hodi buka matenek iha DIT.

(mik)

LEAVE A REPLY

Please enter your comment!
Please enter your name here

NEWS UPDATE

Atletizmu Realiza Kampionatu Nasional

DILI, STLNEWS.co – Federasaun Atletizmu Timor Leste realiza kampionatu nasional, ho objetivu hodi halo selesaun ba atleta sira neebe mak atu partisipa iha kompetisaun Sea...

Suku 4 Iha Munsipiu Aileu Seidauk Asesu Eletrisidade

DILI, STLNEWS.co – To'o oras nee suku 4 iha Munisipiu Aileu, kompostu husi aldeia 31 seidauk asesu eletrisidade, tanba nee sente hanesan diskriminasaun ba populasaun. Informa...

TL Presiza PR Iha Maturidade No Matenek

DILI, STLNEWS.co – Loron 19 fulan Marsu sei hala'o eleisaun prezidensial, tanba nee Timor Leste (TL) presiza Prezidente Republika (PR) neebe maturidade no matenek. Tuir...