Ema Hotu Iha Direitu Asesu Edukasaun

Xave ba determina ema nia futuru mak edukasaun, tanba nee ema hotu iha direitu atu asesu edukasaun neebe mak diak. (Foto: GSE)

DILI, STLNEWS.co – Xave ba determina ema nia futuru mak edukasaun, tanba nee ema hotu iha direitu atu asesu edukasaun neebe mak diak.

“Hau nian kondisaun mak defisiente, maibe hau sempre iha vontade atu hetan edukasaun neebe hanesan ho maluk sira seluk, tanba liu husi edukasaun mak bele determina ita nian futuru neebe mak diak, atu asesu edukasaun nee hau hanoin la haree ba ita nian kondisaun fiziku, maibe nee depende ba ema ida-idak nian vontade neebe diak atu hetan edukasaun,” dehan Joanico Marques hanesan defisiente ba STL, iha edifisiu MEJD Vila-Verde, Dili, Kinta (04/03/2021).

Nia dehan, futuru oan sira nian importante tebes, oinsa familia apoiu oan sira nian estudu, hahu iha nivel pre eskolar too iha nivel ensinu superior, inan aman sira tenke fo sira nian apoiu ba oan sira nian estudu, liu-liu inan aman hirak neebe sira nian oan defisiente, tenke fo apoiu nafatin sira nian estudu.

“Dala barak ema ho kondisaun defisiente mos hetan kualidade neebe mak diak, no hetan valor neebe mak diak liu. Durante iha hau nian esperensia familia nian, liu-liu hau nian inan aman, neebe durante nee apoiu hau nian estudu too agora hau kontinua iha UNPAZ semester lima, hau agradese ba hau nian inan aman no familia sira, tanba suporta hau nafatin iha hau nian estudu too ohin loron,” katak nia.

Iha parte seluk, Programa Manajer husi AHISAUN, Agostinho do Rego husu ba ema hotu labele halo diskriminasaun ba ema ho defisiente, no inan aman sira oinsa lori oan sira bele asesu ba edukasaun.

“Durante nee ami mos sempre ba halo sosializasaun iha area remotas, para bele fahe informasaun iha area remotas, liu-liu ba maluk defisiente sira, tanba sira mos iha direitu asesu ba edukasaun,” informa nia.*

Reportajen: Jacinta Sequeira
Editora: Carme Ximenes

LEAVE A REPLY

Please enter your comment!
Please enter your name here