ESJ No. 4 Setembru Nakonu Ho Tahu

Relasiona ho udan boot neebe akontese iha Sabadu kalan too Domingu, rezultada inundasaun mosu iha fatin-fatin, liu-liu iha kapital Dili, ho ida nee too agora iha Eskola Sekundariu Jeral (ESJ) no. 4 de Setembru Balide, sei nakonu ho bee no tahu nurak. (Foto: STL)

DILI, STLNEWS co – Relasiona ho udan boot neebe akontese iha Sabadu kalan too Domingu, rezultada inundasaun mosu iha fatin-fatin, liu-liu iha kapital Dili, ho ida nee too agora iha Eskola Sekundariu Jeral (ESJ) no. 4 de Setembru Balide, sei nakonu ho bee no tahu nurak.

Tuir observasaun STL iha terenu, Kuarta ohin (07/04/2021), katak, iha resintu ESJ no 4 de stembru Balide, sei kontinua ho tahu nurak, inklui bee sei nalihun no seidauk maran, aleinde nee mos iha bee dalan neebe mak antes nee parte eskola nian hadia ona, maibe bee dalan nee mos sei kontinua nakonu ho bee.

Bee neebe sei kontinua nalihun nee iha area eskola refere, iha parte sala nian kotuk, no dalan tama ba iha eskola nian, neebe mak too agora sei nakonu ho bee no tahu nurak, maske inundasaun nee mosu desde iha Sabadu kalan too Domingu, maibe Kuarta ohin tahu refere seidauk maran no bee kontinua sei nalihun nafatin iha eskola refere, no vitima ba dezastre naturais balun lori sira nian roupa ba fase iha eskola refere.

Iha parte seluk, media STL mos halo observasaun iha Eskola Sekundariu Jeral Finantil Aimutin, hodi haree direita kondisaun eskola refere, maibe Eskola Finantil la afeita ba iha inundasaun neebe mak akontese iha fatin-fatin, tanba area eskola oin laiha bee no tahu, maibe portaun eskola nian taka metin, no eskola oin nakonu ho ai tahan.

Aleinde halo observasaun iha area eskola nian, maibe STL mos halo observasaun ba iha parte estrada publiku nian, neebe mak too ohin loron sei nakonu ho rai rahun, tanba inundasaun neebe mak akontese, kuaze estrada sira iha kapital Dili nakonu bee no tahu nurak, ikus mai tahu maran nakfila ba rai rahun.

Estrada neebe mak too agora sei kontinua rai rahun mak hanesan iha area Maloa, Bebora, Mandarin, Colmera besik jardim 5 de Maio nian oin, Caicoli, Audian, Aitarak laran, Balide, estrada laran sei kontinua ho rai rahun, maske inundasaun nee akontese iha Sabadu no Domingu semana kotuk, maibe instituisaun relevante sira too agora seidauk fase estrada neebe sei nakonu ho rai rahun.

Estrada laran neebe sei kontinua ho rai rahun, nee bele prejudika mos ba saude komunidade sira nian, liu-liu hirak neebe mak halo sirkulasaun ho transporte hanesan motor, tanba estrada iha parte hirak neebe mak ohin temi, kuaze seidauk fase.*

Reportajen: Jacinta Sequeira/Blandina Mauno
Editor: Ekipa STL

LEAVE A REPLY

Please enter your comment!
Please enter your name here