Eskola 5 Iha Munisipiu Viqueque Presiza Hadia

Foto: Espesial

DILI, STLNEWS.co – Dadaun nee eskola lima (5) iha munisipiu Viqueque mak presiza hadia, tolu halo rehabilitasaun no rua seluk halo konstruksaun foun.

Tuir Diretor Edukasaun Munisipiu Viqueque, Emidio Amaral hatete, iha udan boot foin lalais nee eskola sira iha Munisipiu Viqueque la hetan inundasaun, maibe iha Viqueque eskola lima mak presiza atu hadia ba oin, maibe too agora orsamentu seidauk rona, bainhira iha ona orsamentu, nee bele hadia ona eskola sira nee.

“Hau hanoin eskola lima neebe mak ba oin atu hadia nee, hau hanoin rua presiza halo konstruksaun foun, tolu tama iha kategoria rehabilitasaun nian laran, eskola lima nee EBC hotu, maibe atu halo konstruksaun no reabilita nee ita sei hein orsamentu. Fasilidade meja ho kadeira nee menus kleur ona, tanba kadeira sira neebe iha desde iha tinan 2000 too agora tama ona 2021 meja no kadeira la tahan ida, tempu nee kleur halo meja no kadeira sira balun tohar,” dehan Emidio ba STL liu husi telefone Kinta (08/04/2021).

Emidio akresenta, iha eskola balun too agora sei menus meja ho kadeira, fasilidade meja no kadeira menus, tanba balun kleur ona ladun diak, ho ida nee sei presiza tan meja ho kadeira neebe mak presiza.

“Hau hanoin kuaze postu lima mak ita sei presiza tan meja no kadeira, tanba eskola balun halo iha tinan 2019 nee seidauk ense meja no kadeira, uluk iha VI Governu ami husu ona, maibe seidauk realiza, tanba nee ita hadia no prepara fasilidade hirak nee ita sei presiza orsamentu, tanba too agora ita sei hein orsamentu,” tenik nia.

Nia hatete, eskola sira nee presiza atu rehabilita, liu-liu eskola lima neebe mak ohin temi ona, oinsa mak atu bele halo rehabilitasaun no halo konstruksaun ba eskola sira nee, tanba eskola tolu tama iha kategoria rehabilita no rua seluk tama iha kategoria halo konstruksaun foun, maibe buat sira nee hotu presiza iha orsamentu atu bele hadia.

Iha fatin seluk, Diretor ESJ no 4 de Setembru Balide, Sergio A.da Cruz hatete, konaba fasilidade hanesan meja no kadeira sei presiza nafatin, tanba haree mos ba numeru estudante sira nian kada tinan sempre aumenta, ho ida nee presiza meja no kadeira, karik balun tohar, para bele troka kedas.*

Reportajen: Jacinta Sequeira
Editora: Domingas Gomes

LEAVE A REPLY

Please enter your comment!
Please enter your name here