Eskola Hein Desizaun MEJD; Estudantes Lauza Maskra Haruka Fila

Adjuntu Eskola Sekundariu Jeral Nobel da Paz, Agostinho Pinto. (Foto: STL/Jacinta Sequeira)

DILI, STLNEWS.co – Bainhira atu suspende atividades ensinu aprendizajen ba estudantes, parte eskola hein desizaun husi Ministeriu Edukasaun, Juventude, no Desportu (MEJD).

Tuir Adjuntu Eskola Sekundariu Jeral Nobel da Paz, Agostinho Pinto katak, haree ba dadaun nee moras Covid-19 hahu transmisaun lokal iha TL, ho ida nee parte husi eskola nian nafatin halo esforsu aan nafatin, hodi bele halo kontrolu ba nia estudante sira iha eskola, inklui manorin nain sira, hodi bele tuir regras sira neebe husi MS no OMS, ba estudante sira neebe mai eskola la uza maskra, parte eskola haruka sira fila ba uma.

“Konaba PN husu atu suspende atividades eskola, ami sei hein desizaun husi governu, liu husi parte MEJD, bainhira hasai ona karta sirkular ruma, hodi bandu atividades eskola, ka hapara ami sei hakruk, no halo tuir, tanba ita hotu hakarak Timor Leste livre husi moras ida nee, maibe too agora MEJD seidauk hasai karta sirkular ruma hodi hapara atividades, tanba nee, atividades eskola sei kontinua lao normal nafatin too agora,” dehan Agostinho ba STL, iha nia knaar fatin Kintal Boot Dili, Tersa (02/03/2021).

Nia dehan, dadaun nee prosesu aprendizajen iha sala lao normal hanesan bai-bain, maibe antes estudante sira tama iha sala laran, eskola nomeia pesoal ida neebe mak responsabilidade halo teste uluk ba estudantes, no manorin nain sira nian temperatura, fase liman, no tenke uza maskra, hafoin tama ba iha sala laran, atu nunee bele kumpri regras husi OMS ninia ba moras Covid-19.

“Ita nian aprendizajen lao hela, ita hein deit desizaun husi parte governu, tanba nee, atividades prosesu aprendizajen iha eskola kontinua lao nafatin, ita nian estudantes tama iha sala, maibe sira nafatin uza maskra, oinsa ita nafatin fo hatene ba ita nian estudantes no manorin sira, para kumpri nafatin regras,” tenik nia.*

Reportajen: Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here