Eskola Infrenta Problema Infraestrutura

Ofisial Monitorin no Advokasia HAK, Carlito da Costa. (Foto: STL/Blandina Mauno)

DILI, STLNEWS.co – Durante nee HAK halao monitorizasaun ba iha setor edukasaun, deskobre kuaze eskola sira infrenta problema infraestrutura.

Ofisial Monitorin no Advokasia HAK, Carlito da Costa hatete, HAK iha planu programa jeral tau matan ba asuntus lubuk ida inklui edukasaun no HAK halo monitorizasaun, iha munisipiu 6 hodi haree deit ba kondisaun infraestrutura sira relasaun ho kurikulum, inklui mos ho kondisaun hirak neebe eskola sira infrenta.

“Husi dezafiu sira neebe eskola hasoru liu-liu infraestrura enjeral halai ba kondisaun sira hanesan kadeira, saneamentu, bee mos no haris fatin,” dehan nia ba STL, iha nia knaar fatin, Farol, Dili, Tersa (19/01/2021).

Nia hatutan, HAK iha esprensia kona ba deskobrementu iha tinan kotuk, wainhira halo monitorizasaun iha munisipiu Dili ho Aileu, HAK hetan katak iha eskola balun dala ruma bee haris fatin laiha.

Aliende nee laos deit HAK halo monitorizasaun iha munisipiu 6 maibe iha tinan kotuk HAK halo programa auditoriu sosial espesifiku iha munisipiu Ainaro, oinsa atu haree klean liu ba dezafiu no prosesu hirak neebe eskola sira infrenta.

Nia sublina, wainhira HAK halo monitorizasaun iha eskola profesores sira atu ba uza haris fatin, maibe laiha entaun profesores sira tenke impresta komunidade nia haris fatin.

“Posibilidade husu dala ida ka rua, sei ba dala tolu ita ema iha sentimentu ho situasaun sira hanesan nee profesores sira ba uma lafila, entaun implika ba prosesu estudante sira ka kualidade ensinu,” dehan nia.

Nia husu governu atu investimentu rekursu ida neebe mak kualidade no rekursu ida neebe atu koresponde ka kontuinu no lori estadu ba oin, tenke presiza investimentu rekursu umanu no governu tenki kria kondisoens ba eskola sira liu-liu infraestrutura sira, atu nunee estudante sira bele halao estudu ho diak.

Iha prosesu HAK deskobrementu balun iha monitorizasaun hatudu katak, sei iha kondisaun ida neebe mak kalen balun kuak entaun iha tempu udan habokon estudante sira,tanba nee prejudika ba prosesu aprendizajen estudante nian.

Tanba nee governu iha planeamentu ba iha setor edukasaun nian, nunee tenke harii ka rehabilita no halo konstrusaun foun ona ba kondisaun eskola hirak neebe identifika iha baze de dadus inklui ba eskola hirak neebe seidauk identifika no ba eskola sira neebe maka identifika ona, governu tenke hahu ona ajustamentu ba Orsamentu Jeral Estadu, atu nunee ba futuru ka tinan ida nee ba oin hadia kondisaun hirak nee.*

Reportajen: Blandina Mauno
Editora: Carme Ximenes

LEAVE A REPLY

Please enter your comment!
Please enter your name here