Estudante 99 Abertura Ba Izame PAP

Estudante nain 99 abertura ba izame Prova Aptidaun Profisional (PAP) iha Eskola Sekundariu Tekniku Vokasional de Industria i Teknologia (ESTV-IT) 28 de Novembru Becora, Dili. (Foto: STL/Blandina Mauno)

DILI, STLNEWS.co – Estudante nain 99 abertura ba izame Prova Aptidaun Profisional (PAP) iha Eskola Sekundariu Tekniku Vokasional de Industria i Teknologia (ESTV-IT) 28 de Novembru Becora, Dili.

Antes hahu inisiu rejistu, total alunus nain 135. Depois estadu emerjensia tama fila fali, agora dadauk tuir hela prova izame abtidaun nain 99, hatete Diretor ESTV-IT 28 de Novembru Becora, Pedro da Silva Ximenes ba jornalista iha Becora, Segunda (19/10/2020).

Kestaun estudante neebe latuir prova izame abtidaun nee, nia parte seidauk hatene razaun saida maka sira latuir. I too agora mos estudante sira seidauk ba eskola. Ezame PAP nee diferensia ho izame nasional. Ezame PAP, estudante sira tenki tuir tanba prova abtidauk nee atu sukat sira nia kapasidade integru pratika neebe durante tinan 3 sira aprende.

Konaba sira nia kapasidade, nia dehan, iha profesional sira halo. Atraves husi prova abtidaun ida nee. Prova abtidaun bele mos fo impaktu ba izame nasional tanba estudante atu pasa ka lae tenki akumula husi valor sira neebe iha mak foin bele fo rezultadu, kuandu ladiak bele mos impaktu ka laliu iha izame nasional.

ESTV-IT 28 de Novembru Becora Dili, iha departamentu haat hanesan Artegrafika, Informatika, Elektrisidade no Elektronika.

Ekipamentus ba estudante sira neebe mak iha dala barak hatoo ona katak, iha departamentu rua hanesan artegrafika iha komputador 48 ho informatika iha komputador hamutuk 18 hodi fasilita estudante sira.

No departamentu 2 seluk hanesan elektronika ho elektrisidade ida nee ami hatete, sasan sira neebe uza ba pratika, estudante sira maka aranja hamutuk ho professores sira tuir nesesidade departmentu nian.

Aleinde nee mos foin dadauk udan boot bee tama iha area eskola, estraga fasildade balun hanesan komputador sira nee, maibe estudante neebe mak eskola kona ba informatika konsege hadia fila fali.

Iha fatin hanesan, Ministru Edukasaun Juventude no Desportu (MEJD) Armindo Maia hatete, ezame abtidaun ba estudante ESTV-IT 28 de Novembru nee importante, hodi haree kondisaun eskola ida nee.

Foto: STL/Blandina Mauno

Eskola ESTV-IT 28 de Novembru, desde tempu Indonezia hadia balu ona, maibe presiza halao nafatin esforsu para hadia iha rekursu humanu, infraestrutura no fasilidade sira seluk.

MEJD halo politika primeiru halo tiha avaliasaun ida ba ESTV sira iha timor laran tomak, liuliu sira neebe uluk konverta tiha husi sekundariu jeral ba fali ESTV maibe naran mak muda, iha laran pratikamente lamuda.

Depois husu apoiu ba parseiru sira buka oinsa defini fali area sira neebe presiza duni, no investe ba ESTV sira nee, tanba ESTV sira iha relasaun ho empregu no dezenvolvimentu.

Se tama ba ASEAN, traballador sira mai husi liur barak. Empragadu, laiha formasaun, maibe MEJD labele servisu ketak, tenki hamutuk ho SEFOPE no ministeriu relevante sira.*

Reportajen: Blandina Mauno
Editor: Ekipa STL

LEAVE A REPLY

Please enter your comment!
Please enter your name here