Estudante DIT 12 Vizita STL

Estudante Universidade Dili Institute of Tecnologi (DIT) nain 12, husi Deparamentu Siensia Komputador DIT Oecusse, halao vizita ba Midia Suara Timor Lorosae, hodi haree oinsa servisu multimidia iha STL. (Foto: STL)

DILI, STLNEWS.co – Estudante Universidade Dili Institute of Tecnologi (DIT) nain 12, husi Deparamentu Siensia Komputador DIT Oecusse, halao vizita ba Midia Suara Timor Lorosae, hodi haree oinsa servisu multimidia iha STL.

Koordenador Departamentu Siensia Komputador ,Marcelo Chan hatete, objetivu husi vizita deparamentu Siensia Komputador DIT Oecusse nian, mai iha STL nee hanesan programa ida neebe sira trasa ona iha tinan tinan, liuliu kona ba materia multimidia no nia aplikasaun.

“Ami mai atu aprende liuliu atu hare deit oinsa maka atu hare konaba materia multimidia no nia aplikasaun, nee maka ami nia objetivu husi vizita nee,” dehan nia ba STL, iha knua STL, Osindo Surikmas, Dili, Tersa (13/10/2020).

Nia dehan, vizita nee iha tinan kotuk sira halao iha GMN no iha STL hotu, tinan ida nee sira hili iha STL nafatin no mos iha midia Maxthall.

Nia hatutan, depois de vizita nee estudante sira fila ba halo relatoriu, kona ba materia saida maka sira hetan husi vizita nee, oinsa atu haree kona ba editing nian durante iha terenu.

Iha fatin hanesan Xefe Redasaun midia Suara Timor Lorosae (STL), Domingos Saldanha hatete, Universidade DIT ho STL amizade ona iha kedas tinan 2001 no 2002 iha tempu neeba, hahu servisu hamutuk hodi lasu ona amizade hodi atribui koperasaun nee, bainhira instituisaun STL neebe uluk sei harii iha Colmera, tanba nee koperasaun STL no DIT lao tinan naruk ona to ohin loron.

“Kooperasaun nee iha area nivel publikasaun, nivel notisia, iha mos nivel publisidade, no mos DIT ho STL iha ona asina akordu memorandu entendementu ida, atu oinsa iha kualker notisia no kualker publikasaun, bele publika hodi habelar atividade DIT nian, liu husi midia, liuliu STL,”

Tanba nee koperasaun entre DIT ho STL lao tinan naruk ona, neebe ho nia karakter rasik, ho nia entendementu rasik.

Xefe redasaun STL nee informa ba estudante 12 nee kona ba, iha tempu tinan 2001-2002 neebe sira hahu iha Colmera ho midia plataforma iha deit maka jornal imprime, atu konsentra deit ba jornal oinsa maka atu fahe informasaun ba povu no sidadaun tomak iha timor.

“Iha tinan 2008 hau hamutuk ho Pak Kris hamutuk ho DIT, hodi trasa plataforma ida ho media online ho digitalizasaun STL jornal iha nivel plataforma virtual,” dehan nia.

Nia hatutan, liu husi prosesu hirak nee, too mai ohin loron tama ona ba virtual liu husi Youtube ho televizaun, no oras nee media STL iha ona plataforma jornal televizaun, radio, no online.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here