Estudante UCT Orgulhu Enkontru Ho PR

DILI, STLNEWS.co – Estudante Universidade Katolika Timorense (UCT) senti orgulhu, tanba bele halo enkontru ho Prezidente Republika Jose Ramos Horta. Iha biban nee, estudante sira hatoo parabens ba prezidente, tanba asumi mandatu ba tinan ida ona.

Bainhira remata halo Enkontru, Estudante UCT Tanicia Silveira Morais hatete ba jornalista sira iha Palasiu Prezidente Bairu Pite, Kinta nee (25/05/2025) katak, iha enkontru nee sira mos rona ajenda balun husi prezidente.

“Ohin ami husi eskola UCT, Fakuldade Siensia Humana, Departamentu Jestaun Emprezarial, ami nia objetivu hasoru prezidente atu fo kongratula ba prezidente, tanba tinan 1 ona nia mandatu nudar Prezidente Republika. Ami konversa lubuk ida ho prezidente, no prezidente aprezenta nia ajenda balun mai ami, ami senti orgulhu tebes, tanba nia fo ona tempu ba ami estudante sira bele konversa ho nia,” katak estudante nee.

Nia hatete, iha biban nee sira mos rona ideas balun husi prezidente, nudar bukae ba iha sira nia estudu.

“Asuntu prinsipal neebe mak ami diskuti ho prezidente mak mai hatoo parabens ba prezidente, no ami laiha asuntu seluk koalia ho prezidente, ami mai hanesan estudante no Timor oan mai fo parabens ba prezidente neebe sai ona aman ba ita nia nasaun durante tinan ida nia laran,” katak nia.

Iha biban nee, Prezidente Republika Jose Ramos Horta husu estudante sira esforsu aan estuda, tanba futuru iha joven sira nia liman.

Prezidente mos husu atu estuda diak, nunee ba futuru halo dezenvolvimentu ekonomia ba nasaun nia.

(eme)

LEAVE A REPLY

Please enter your comment!
Please enter your name here