Feto Partisipa Iha Setor Edukasaun

Dekanu Fakuldade Siensia Sosiais UNTL, Camilio Ximenes Almeida. (Foto: STL/Jacinta Sequeira)

DILI, STLNEWS.co – Feto nia partisipasaun iha aera edukasaun hahu aumenta, tanba iha eskola sira numeru feto mak domina liu mane sira.

Tuir Diretor Edukasaun Munisipiu Viqueque, Emidio Amaral katak, haree husi estudantes, maioria feto mak barak sempre iha valor no tampil iha pidato, entaun asesu edukasaun iha Munisipiu Viqueque feto mak sei domina.

“Hau nian haree no hatene, feto nian partisipasaun iha edukasaun, iha ona maibe presiza atu aumenta tan iha parte diregente, nee mak feto sei menus, tanba iha Munisipiu Viqueque feto neebe hola parte iha diregente foin mak nain 4 deit, edukasaun nain 2 no husi parte saude nian nain 2. Hau hanoin presiza aumenta tan feto mos iha kapasidade balun liu fali mane sira,” dehan Emidio ba STL, liu husi telefone, Kinta (18/03/2021).

Iha fatin seluk, Dekanu Fakuldade Siensia Sosiais UNTL, Camilio Ximenes Almeida hatete, feto nian partisipasaun iha dezenvolvimentu, maibe dala ruma ho kultura patriarkal, neebe mak dala barak la fo biban ba feto sira, atu bele asesu ba iha edukasaun.

“Depois de evolusaun, mundu nian iha ona ezijensia husi ita nian maluk feto sira, liu-liu sira husu nia direitu, atu bele asesu iha informasaun, atu hasae kapasidade feto no asesu iha edukasaun formal, maski ezijensia nee husi loron ida ba loron seluk, mosu mos movimentus barak, atu defende feto nian partisipasaun, iha dezenvolvimentu maibe dala ruma ita nian kultura patriakal neebe dala barak la fo biban ba feto sira atu partisipa barak iha asesu ba edukasaun,” tenik nia.*

Reportajen: Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here