Finalista Pre-Eskolar Moris Foun 124 Halo Graduasaun

Seremonia graduasaun ba finalista hamutuk 124, husi Pre-Eskolar Moris Foun 1, ba dala neen iha tinan 2020. (Foto: STL/Jacinta Sequeira)

DILI, STLNEWS.co – Seremonia graduasaun ba finalista hamutuk 124, husi Pre-Eskolar Moris Foun 1, ba dala neen iha tinan 2020.

Ba STL, Xefi Departamentu Pre-Eskolar Nasional, Eliasefa Barreto, agradese ba inan aman sira, neebe mak durante nee halo koperasaun diak ho eskola, no ohin halo tan seremonia graduasaun ba dala nein iha pre-eskolar ida nee, no husu ba inan aman sira, maske oan sira nee remata ona iha pre-eskolar, maibe oinsa ba oin haruka oan sira ba iha ensinu baziku.

“Hau hanoin agradese no apresia tebes ba entidades sira neebe kopera hamutuk ba iha prosesu aprendizajen husi Janeiru mai too iha fulan Dezembru, maske durante fulan 3 nian laran tanba moras Covid-19, neebe afeita iha mundu tomak, inklui TL, ho ida nee durante fulan 3 nian laran, prosesu aprendizajen la lao, maibe liu tiha ida nee, fulan Jullu kontinua fila-fali, too ohin loron ita bele realiza duni ita nian seremonia graduasaun iha pre eskolar ida nee, hau apersia tebes ho inan aman sira hotu, tanba ho imi nian koperasaun neebe diak hamutuk ho eskola, agradese mos ba EBC neebe fornese fatin ba pre-eskolar ida nee,” dehan Eliasefa ba STL iha EBC Fatumeta Dili, Sabadu (05/12/2020).

Iha fatin hanesan, kordenadora Pre-Eskolar Moris Foun, Domingas Beatriz da Cunha, hatete, ohin finalista iha pre-eskolar ida nee hamutuk 124, halo ona graduasaun, hodi hakat ba ensinu baziku, maibe husu ba inan aman sira tenke haruka oan sira kontinua iha ensinu baziku, no estuda iha ensinu baziku la hanesan ona iha pre-eskolar.

“Hau husu ba inan aman estudantes katak, ohin oan sira graduasaun ona, maibe sira nian estudu laos remata deit iha nee, maibe oinsa mak hakat ba iha ensinu baziku, tanba edukasaun mak sai hanesan xave ba iha prosesu dezenvolvimentu,” dehan nia.*

Reportajen: Jacinta Sequeira
Editor: Ekipa STL

LEAVE A REPLY

Please enter your comment!
Please enter your name here