Hadia Bee Dalan, Evita Inundasaun Iha Eskola

Eskola Sekundariu Jeral no 4 de Setembru Balide, hadia ona bee dalan, atu nunee bele evita inundasaun iha tempu udan. (Foto: STL/Jacinta Sequeira)

DILI, STLNEWS.co – Eskola Sekundariu Jeral no 4 de Setembru Balide, hadia ona bee dalan, atu nunee bele evita inundasaun iha tempu udan.

Diretor ESJ no 4 de Setembru Balide, Sergio A.da Cruz hatete, bee dalan sira nee presiza hadia duni, atu nunee bele evita inundasaun iha tempu udan, tanba dala barak eskola ida nee bainhira udan boot sempre mosu inundasaun, iha tempu udan halo bee nalihun, ho hadia bee dalan ida nee para bele evita ona inundasaun.

“Ohin mos hau ba haree, tanba hodi kalan nee udan boot, no bee nalihun iha eskola karik, maibe lae tanba bee dalan iha ona, ita bele dehan ESJ no 4 bele livre ona husi inundasaun neebe mak durante nee akontese bebeik iha tempu udan boot. Hau hanoin agora livre ona, no la hanesan ho mosu inundasaun neebe akontese iha tinan 2 liu ba kotuk,” dehan Sergio ba STL iha ESJ no 4 Balide, Dili, Segunda (29/03/2021).

Nia hatutan, bainhira iha ona bee dalan para udan mai bee liu husi bee dalan neebe mak iha, no sei la hamosu tan inundasaun iha tempu udan, tanba mosu inundasaun iha tempu udan, liu-liu iha loron neebe atividades aprendizajen ninia, ida nee mak halo bee dalan, nunee bele evita ona inundasaun iha eskola ida nee.

Iha fatin seluk, Milena Ximenes Maia, estudante segundu ano husi ESJ no 4 Setembru dehan, los duni katak sira nian eskola nee bainhira udan boot bee nalihun iha area eskola, no bele tama iha sala aprendizajen, tanba nee ho bee dalan neebe halo ona para inundasaun labele mosu tan iha sira nian eskola.

Nia sublina, agora ho serka sanitaria ba Covid-19 iha kapital Dili, sira iha uma deit, tanba atividades ensinu sei suspende hela, maibe hanesan estudante nafatin estuda materia neebe professor sira fo ona ba estudante sira.*

Reportajen: Jacinta Sequeira/Blandina Mauno
Editor: Ekipa STL

LEAVE A REPLY

Please enter your comment!
Please enter your name here