BAUCAU, STLNEWS.co – Koordenador Eskola Bazika Filial (EBF), Tabere, Quelicai Salustiano Ximenes hatete, dala barak ema boot sira ezije hadia kualidade edukasaun, maibe seidauk rezolve problema edukasaun iha baze.
Preokupasaun nee Salustiano Ximenes informa ba STL iha Tirilolo, Baucau, Kinta nee (09/09/2021).
“Sira koalia iha Parlamentu Nasional neeba hadia kualidade edukasaun, maibe ami profesor nia problema no eskola nia problema sira la rezolve,” dehan Salustiano.
Nia hatutan, iha nasaun neebe deit edukasaun mak importante liu ba nasaun nia futuru, maibe meza no kadeira sira iha EBF Tabere Quelicai, nafatin uza ida iha okupasaun Indonezia nian neebe sira husik hela iha eskola nee.
Nia afirma, tuir lolos estadu tenke tau atensaun ba eskola sira neebe mak kondisaun aat ona, nunee mos fahe merenda eskolar tenke hanesan, maske eskola laos estadu nian, maibe povu Timor nia oan mak eskola iha neeba.
Iha fatin seluk Koordenador EBF Laua-Liu, Postu Administrativu Quelicai, Valdemar Eguido Soares mos hatete, preokupasaun neebe mak EBF Laua-Liu hasoru mak menus sala aprendizajen, meza, no kadeira ba alunus sira.
Nia husu ba parte relevante tau atensaun ba problema hirak nee, tanba edukasaun mak dezenvolve futuru nasaun nian.*
Reportajen: Tomas Reis
Editor: Ekipa STL
