ISC Halao Prosesu Aprendizajen Uza Sistema Online

Vise Reitor Instituto Superior Cristal, Jacinto Junior. (Foto: STL/Blandina Mauno)

DILI, STLNEWS.co – Relasiona serka sanitaria neebe mak implementa iha kapital Dili, Instituto Superior Cristal (ISC), deside halao prosesu aprendizajen liu husi sistema online.

Vise Reitor Instituto Superior Cristal, Jacinto Junior hatete, antes serka sanitaria neebe mak implememta iha tinan kotuk, hafoin governu deside atu aplika estadu emerjensia sira hahu ona prosesu aprendizajen online neebe mak atraves ISC prepara.

“Ami uza sistema online hanesan whatsapp group, google online, zoom meting no google classroom, ida nee ami aplika ona iha tinan kotuk no mos agora nian, oinsa para atu halo atendimentu ba estudante sira, wainhira ita iha situasaun estadu emerjensia,” dehan Vise Reitor ISC Jacinto ba STL, liu husi telefone, Sesta (19/03/2021).

Nia hatutan, depois desizaun balun husi Konsellu Ministru mos fo pasu ba hotu atu halo movimentasaun, maibe iha foin lalais fulan Marsu rezolusaun governu nian neebe mak aplika fila fali iha dia 8 too 15 Marsu no prolonga too agora ami kontinua fila fali ho medidas prosesu aprendizajen neebe mk tinan kotuk ami halao ona.

Maneira ida uza google room hanesan oinsa asina prejensial ba dosentes no estudante sira, entaun mekanismu ida nee atu hatudu katak maske prosesu enkontru direta ita lakonsege halo, tanba ita aplika konfiamentu obrigatoriu neebe mak bazeia ba rezolusaun Konsellu Minisru nian, maibe lataka dalan ba prosesu aprendizajen normal uza hela.

“Ami fiar katak plataforma ida neebe ami kria bazeia ba iha kondisoens neebe infrenta, nafatin fo spasu ba dosentes no estudante atu halao atividade,” dehan nia.

Nia afirma, ida neebe mak lakonsege ami atu halo maka ligadu ho pratika, tanba pratika nee presiza ita enkontru direta entre pesoal ho material sira ka estudante sira presiza kaer sasan pratika nian.

Maibe iha neeba ami mos prepara video pratika sira neebe mak iha, atu nunee estudante sira bele haree no akompana maske sira lakaer direta, maibe sira bele nafatin no akompana ba iha filme sira neebe mak ami prepara, ba estudante sira neebe laiha fasilidade hanesan laptop no telefone android, sira lakonsege tuir prosesu aprendizajen online.

Entretantu total estudante iha ISC no sira seluk pur volta 5.000 resin, kompostu husi Fakuldade Siensia Saude no Edukasaun no dosente permanentes kuaze 400 pesoas.*

Reportajen: Blandina Mauno
Editor: Ekipa STL

LEAVE A REPLY

Please enter your comment!
Please enter your name here