Jornalista Kontribui Kombate Hoax

Iha tempu dijital oras nee sai mos oportunu ba ema iresponsavel sira hodi lansa informasaun neebe la kredibel no falsu. (Foto: Facebook)

DILI, STLNEWS.co — Iha tempu dijital oras nee sai mos oportunu ba ema iresponsavel sira hodi lansa informasaun neebe la kredibel no falsu. Tanba nee jornalista tenke kontribui kombate informasaun hoax sira neebe espalla iha publiku.

Prezidente TLPU (Timor-Leste Press Union), atual Prezidente Tatoli Manuel Pinto ba jornalista sira bainhira partisipa iha seminariu ho temaa Fact-Checking Training for Journalists, Tersa (13/10/2020) iha JL-Villa Fatuhada.

“Seminariu ida nee halao espesial ba jornalista sira, atu kombate notisia hoax ka notisia falsu, tanba jornalista sira mak sai ajente ba fahe informasaun, jornalista atu sira fahe informasaun tenke iha konesimentu no tenke iha kapasidade hodi hatene kona ba notisia hoax nunee bele fahe informasaun los, lolos no kredibel ba publiku,” katak Prezidente TLPU.

Nia informa seminariu nee atu jornalista iha konesimentu ba ida nee no seminariu ida nee parte kontinuasaun husi maluk jornalista Raimundu Oki neebe ba partisipa formasaun iha America koalia kona ba oinsa atu halo verifikasaun ba faktus iha plataforma internet nian.

Nunee mos Embaixadora Estadus Unidus Amerika, Kathleen Fitzpatrick, hatete, embaixada Estadus Unidus Amerika iha Timor Leste kontente tebes atu partisipa ba iha formasaun nee, kona ba treinamentu ba jornalista luta kontra nutisia falsu no lia bosok ka informasaun laloos.

“Ami Estadus Unidus Amerika apoiu liberdade espresaun importante tebes ami apoiu formasaun ba jornalista profesionalismu iha Timor Leste,” dehan embaixadora Estadus Unidus Amerika nee.

Nia hatutan EUA apoia ba iha area espresaun liberdade, oferta informasaun ba jornalista sira kona ba oinsa mak identifika informasaun falsu, no oinsa mos verifika informasaun, analiza informasaun atu hatene informasaun neebe los ka falsu.

Iha fatin hanesan Sekretariu Estadu Comunikasaun Sosial (SECOMS) Mericio Akara dehan nia hetan komvite husi TLPU atu aprezenta politika governu nian kona ba oinsa atu kombate notisia no infornasaun falsu, nunee mos atu halo promosaun ba internet saudavel neebe mak aprezenta politika no prioridade governu nian.
Nia hatutan notisia ka informasaun falsu konsidera ema hotu inimigu, tanba informasaun falsu nee viola direitus umanus sidadaun, liu-liu liga ba direitu atu hetan informasaun loos no kredivel, i ao mezmu tempu viola mos direitu sidadaun nian atu moris iha paz no estabilidade nia laran, tanba ita akompana didiak informasaun falsu ka hoax nee bele provoka tensaun entre individu no grupu. Tanba asesu ba informasaun falsu provoka tensaun depois bele kria ambiente neebe ema deskomfia malu.

Informasaun lalos katak Akara provoka in-harmonia sosial, tanba informasaum falsu nee halo ema duun matak malu, tanba nee politika governu nian hakarak halibur ema hotu atu enkoraja malu iha movimentu kontra informasaum falsu.

“Governu deit labele, i individu ida rua deit labele kombate hoax, tanba agora tempu digitaliza, neebe lia bosok ka informasaun falsu nee espalla ba ema barak, tanba nee partisipasaun ema nian atu tetu informasaun nee mai husi neebe, no loos ka lae,” esplika Akara.
Laos nee deit tuir governantes nee katak, tenke haree informasaun neebe simu nee diak ka lae, se ladiak lalikan hatutan, nunee mos tenke haree informasaun sira nee iha benefisiu ka lae, karik iha benefisiu presiza share, karik ladiak lalika share.

Entretantu iha seminariu nee halao ba jornalista nain 20, husi instituisaun media sira, nunee jornalista sira hetan formasaun kona ba oinsa kombate notisia bosok no falsu. Iha oportunidade nee jornalista Raimundo Oki no parte teknik nain ida fahe konesimentu oinsa verifika imajem no Video falsu no orijinal.*

Reportajen: Guilhermina Franco/ Madalena Horta
Editor: Ekipa STL

LEAVE A REPLY

Please enter your comment!
Please enter your name here