Konferensia Nasional Haforsa Lideransa Feto

Ministeriu Edukasaun neebe hetan apoiu fundus, husi Embaixada Australia realiza konferensia nasional, oinsa haforsa lideransa feto hodi hamate violensia domestika hasoru feto. (Foto: STL/Emerenciana Pinto)

DILI, STLNEWS.co – Ministeriu Edukasaun neebe hetan apoiu fundus, husi Embaixada Australia realiza konferensia nasional, oinsa haforsa lideransa feto hodi hamate violensia domestika hasoru feto.

Lia hirak nee hatoo husi Ministru Edukasaun, Armindo Maia ba jornalista, iha Delta Nova, Dili, Kinta (03/12/2020).

“Objetivu konferensia nasional ba loron rua nee ninia topiku jeral mak oinsa ita bele haforsa lideransa feto no sub tema ida mak oinsa hamate violensia hasoru feto iha neebe deit, iha uma, eskola, sosiedade no promove partisipasaun feto iha prosesu dezenvolvimentu nasional, dala barak ita nia sosiedade hanoin feto nia serbisu iha uma ho haree labarik deit, maibe ohin loron oin seluk ona,” katak Ministru nee.

Tempu uluk tuir Governante nee katak, beiala sira iha pensamentu katak feto iha uma deit, maibe agora iha mudansa ona, tanba nee papel edukasaun importante tebes, tanba edukasaun laos iha eskola deit maibe hahu iha uma.

Edukasaun nee laos iha eskola deit, maibe hahu iha uma inan aman sai professores hanorin oan sira, depois neneik ba eskola laos nee deit, maibe papel Igreja no sosiedade sivil mos importante tebes.

Nia hatutan feto laos partisipasaun hanesan membru, maibe feto mos bele sai lider sira, tanba nee mak ohin loron feto barak mak sai ona deputadu.

Iha fatin hanesan Embaisador Australia, Peter Roberts hatutan, Embaixada Australia mos serbisu hamutuk ho governu Timor Leste no parseria sira seluk, atu promove importansia igualdade jeneru no respeita feto no labarik sira, tanba feto papel importante iha prosesu dezenvolvimentu nasional.

“Ba Futuru Australia kontinua serbisu iha area nee, tanba feto nia knaar importante iha dezenvolvimentu Timor Leste iha future no Australia kontinua, empodera feto Timor atu kontribui Timor Leste nia dezenvolvimentu,” hatete nia.

Entretantu orsamentu neebe mak embaixada Australia apoiu ba edukasaun tinan ida nee hamutuk Dolar Australia Millaun haat/millaun AU$ 4 nee ba iha edukasaun.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here