Kualidade Edukasaun Sei Hakdasak

DILI, STLNEWS.co – Too oras nee, kualidade edukasaun sei hakdasak, tanba rekursu umanu no fasilidades eskola sei menus.

Tuir Reitor Instituto Filosofico Sao Francisco de Sales (IFFS), Pe. Manuel Pinto katak, depois referendum saida maka akontese, profesores sira neebe iha kualidade nee fila hotu ba sira nia rain, ho nunee TL hela ho zero, ema barak hakarak atu loke eskola, maibe sira nia konseitu kona ba edukasaun nee minimu liu.

“Hau atu dehan katak kualidade edukasaun los duni sei hakdasak hela, tanba primeiru maka rekursu umanu no fasilidades sei menus, agora iha profesores ba ensinu hotu-hotu barak nee iha kuantidade maibe kualidade nee ita seidauk haree,” dehan Reitor IFFS, Pe.Manuel Pinto ba STL iha knaar fatin Don Bosco Comoro, Kinta (24/06/2021).

Pe. Manuel haktuir, nudar kongresaun hari eskola barak liu-liu iha Baucau, Salesiano sira tau matan ba eskola barak, eskola formal, eskola professional STM, eskola non formal sentru treinamentu sira durasaun tinan ida, tinan sanulu atu bele aumenta esperensia.

Nia dehan, presiza forma uluk rekursu umanu atu bele fo kualidade ba estudante sira, kuandu sira neebe hanorin maka laiha kualidade, oinsa fo kualidade ba alin sira.

Pe. Manuel informa, aleinde rekursu umanu, fasilidade mos parte importante atu suporta edukasaun. Nia fo ezemplu iha ensinu superior balun neebe departamentu enfarmajen, kimia maibe labotoriu laiha, labele hanoin deit kona ba teoria, maibe presiza mos haree ba pratika.*

Reportajen: Joaninha Belo
Editora: Josefa Parada

LEAVE A REPLY

Please enter your comment!
Please enter your name here