Partisipasaun Feto Iha Edukasaun Balansu

Feto nia partisipasaun iha nivel edukasaun hahu iha ona balansu, tanba oras inan aman hahu komprende kona ba igualidade jeneru. Nunee sira fo ona oportunidade ba feto asesu ba edukasaun. (Foto: STL/Emerenciana Pinto)

DILI, STLNEWS.co – Feto nia partisipasaun iha nivel edukasaun hahu iha ona balansu, tanba oras inan aman hahu komprende kona ba igualidade jeneru. Nunee sira fo ona oportunidade ba feto asesu ba edukasaun.

Lia hirak nee hatoo husi Ministru Edukasaun, Armindo Maia ba jornalista, iha Delta Nova, Dili, Kinta (03/12/2020).

“Ita haree feto nia partisipasaun iha edukasaun ita haree husi rasio entre feto ho mane kuaze ladun iha diferensia ida kuaze 50% hotu, nee hatudu katak iha edukasaun buat ida balansu nee iha ona,”hatete ME Armindo.

Ministru nee hatutan, professora feto presiza enkoraza liu tan, iha nasaun barak professora feto mak barak liu, maibe iha Timor Leste mane sei domina liu, mais laos mos atu dudu sai mane hodi hatama fali feto ba nee lae.

Nunee mos Diretora ba Serbisu Ministeriu Edukasaun Juventude Munisipiu Aileu ,Cristina da Concencao hatutan, feto nia partisipasaun ba iha nivel edukasaun kompara ho tempu uluk iha diferente ona.

“Feto nia partisipasaun iha edukasaun haree ba Global kompara ho tempu sira uluk ita haree iha mudansa no mudansa hahu kedas iha uma laran, tanba inan aman iha ona konsensia katak feto sira mos iha direitu asesu edukasaun,” hatete Cristina.

Nia hatutan, haree numeru iha eskola mesmu sala balun mane numeru aas liu feto no balun feto numeru aas liu mane, maibe enjeral feto sira nia partisipasaun diak tebes, kompara ho tempu uluk.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here