DILI,STLNEWS.co – Prezidente Republika (PR) Jose Ramos Horta halo lansamentu ba livru neebe hakerek husi Prezidente Partidu Sosialista Timorense (PST), ho topiku As prinsipais etapas rumo ao socialismo humanista popular assente na cultura e lisan de Timor Leste.
Iha biban nee, Prezidente Republika Jose Ramos Horta liu husi diskursu hatete, ohin nia marka prezensa iha UNITAL, tanba konvida husi Prezidente PST hodi halo lansamentu ba livru neebe hakerek husi Avelino Coelho.
“Hau mai iha nee hodi halo lansamentu ba iha obras, infelizmente hau ajenda nakonu tuku 3, hau halo palestra konferensia ida iha Palasiu Prezidensial ba korpu diplomatiku ho konvidadus sira seluk, neebe hau fila husi palasiu antes,” katak PR Horta iha salaun UNITAL Bekora, Kinta nee (13/04/2023).
Horta hatete, nia marka prezensa iha universidade hodi halo lansamentu livru ida neebe hakerek husi Prezisente PST rasik, maibe ema balun bele julga katak prezidente ba apoiu politiku ba partidu balun.
Iha biban nee, Prezidente Relublika mos husu estudante sira iha Timor Leste laran tomak nafatin estuda, tanba jerasaun ou estudante sira mak futuru nasaun nian.
Nunee mos Prezidente Partidu PST, Avelino Coelho hatutan, orgulhu no agradese ba prezidente, tanba bele halo ona lansamentu ba livru ho topiku “As prinsipais etapas rumo ao socialismo humanista popular assente na cultura e lisan de Timor Leste”.
“Ami politiku neebe defende sosializmu, ami hakerek livru oan ida dehan, as prinsipais etapas rumo ao socialismo humanista popular assente na cultura e lisan de Timor Leste, katak sosializmu neebe defende nee universal, ema hotu defende, balun iha partidu no balun laiha mos sosialista, ami defende sosialista humanista popular katak, too iha neeba livru oan nee mak hatudu hela dalan parte istoriku oinsa bele manan,” katak nia.
Nia hatutan, defende sosialista humanista nee tuir lisan no kultura Timor nia, no livru neebe mak hakerek pajina 50 ital.
Nia hatutan, livru nee hakerek husi PST, maibe rona opiniaun no dialogu ho estudante sira hodi rona sira nia ideas, depois iha ema ida rua mak elabora hodi sai livru.
Nunee mos Pro Reitor UNITAL, Cirilio Baltazar mos lori universidade nia naran hatoo agradese ba Prezidente Republika Jose Ramos Horta, tanba bele marka prezensa hodi halo lansamentu livru ida neebe mai husi estudante no Prezidente PST Avelino Coelho rasik.
“Agradese mos ba hau nia estudante sira neebe organiza eventu nee hamutuk ho Avelino Coelho, hodi halo lansamentu ba livru neebe tau ona Banner neeba,” katak nia.
Iha biban nee, nia mos husu Prezidente Republika labele ba dala ida nee deit, maibe karik bele mai tan hodi halo palestra ba iha estudante sira iha UNITAL.
(eme)
