PR Sujere Escola Presiza Kuda Kualidade

Prezidente Republika Francisco Guterres Lú Olo sujere ba escola sira presiza kuda kualidade iha prosesu aprendisazen. (Foto: Media PR)

ERMERA, STLNEWS.co – Prezidente Republika Francisco Guterres Lú Olo sujere ba escola sira presiza kuda kualidade iha prosesu aprendisazen.

PR Lú Olo hatoo kestaun nee liu husi mensajen ba estudante sira bainhira vizita Escola Ensinu Baziku 10 Abril Ermera-Gleno, Kuarta (18/11/2020).

“Ho haksolok tebes mak ho Prezidente Republika ohin vizita liu husi imi nia escola ho oan no professores no professora sira ohin ba oin, Prezidente Republika hakarak husik hela deit liafuan ida ba imi alunus no professores no professora sira hau kuda hela ai oan ida no ai nee naran rambutan, agora hau fila rambutan ba fali escola nia naran mak, Prezidente Republika hakarak kuda iha escola nee mak kuda kualidade escola ensinu iha aprendisazen.” hatete Lú Olo.

Xefe Estadu hatete Timor Leste rai ida kiik maibe ho oan feto no oan mane barak tebes, no Timor atu ba oin so oan ho beioan sira mak bele kaer tutan.

“Valores husi beiala sira nia desde luta ba ukun rasik aan nia, too mai ita ukun rasik aan nia so oan ho beioan sira mak bele kaer, atu kaer valores sira nee hotu oan ho beioan sira tenke matenek, matenek para haree husi nia aldeia no haree mos ba aldeia sira seluk atu hatene haree husi Ermera ba too iha Suai ba too iha Oecusse liu husi Atauro ba too fali iha Jaco Tutuala signifika katak, Timoroan sira tenke hatene nia aan katak koinese nia aan nuudar Timoroan koinese nia rai no koinese nia valores sira, para atu moris tuir liu husi edukasaun formal neebe oan sira simu dadaun husi professores sira” katak PR Lú Olo.

Xefe Estadu hatutan estudante presiza koinese nia aan no koinese nia rai para atu lori nasaun nee lao ba oin, tanba ohin loron mundu neebe mak sai modernu tebes no mundu neebe kompete makaas liu husi teknologia foun neebe pais sira dezenvolvidu liu husi siensia neebe mak sira hatene para atu transmite ba ema seluk no rai seluk ba povu.

Aman Nasaun nee hatutan Timor tenke iha duni kualidade edukasaun para atu tama iha kompetisaun iha mundu, nunee hatudu mos ba mundu seluk katak Timor mos matenek, bainhira Timor hamutuk ho nasaun seluk sai membru tenke hatudu mos katak Timor nia oan sira mos matenek duni tanba nee mak ai rambutan neebe mak PR kuda bele nakfilak fali sai ensinu neebe mak diak.

“Laos deit ida nee maibe presiza mos haree ita nia inan no aman sira neebe mak hanorin iha escola, presiza hatene katak inan aman sira hatene duni valores no hatene siensia para atu bele transmite ba imi maibe sira mos tenke prepara atu bele lao ba oin nafatin.” hatete Lú Olo.

Lú Olo hatutan formasaun ba professores no professora mos importante, tanba nee mak tenke lao nafatin nunee bele akompanha nafatin oan sira too nivel neebe boot no universitariu no nivel neebe mak aas.

PR mos dezezu ba estudante terseiru ano sira atu susesu nafatin, no iha biban nee PR mos hatoo parabens ba estudante hotu no professores no professora hotu.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here