Professores 60 Resin Tama Idade Reforma

Foto: Espesial

DILI, STLNEWS.co – Dadaun nee professores hamutuk 60 resin husi eskola Munisipiu Viqueque, sei tama idade reforma iha tinan ida nee.

Diretor Edukasaun Munisipiu Viqueque, Emidio Amaral hatete, professores neebe atu tama iha idade reforma ba tinan ida nee iha eskola sira Munisipiu Viqueque hamutuk 60 resin, neebe haruka ona sira nian naran mai iha rekursu umanus Ministeriu Edukasaun, atu nunee bele halo prosesu ba reforma ninia.

“Karik fo ona reforma ba sira, nee hau hanoin professor menus, portantu ita hein deit husi MEJD, maibe karik posibilidade reforma sira sei forsa, sira sei kontinua hanorin nafatin hodi hein teste neebe mak ministeriu hatete katak, novi sentus e tal, professor neebe atu halo teste iha tinan ida nee, sekarik orsamentu aprova ita haree, sei halo teste ba professor foun,” dehan Emidio ba STL, iha edifisiu Infordepe Balide, Dili Segunda (08/03/2021).

Nia dehan, maioria professores neebe tama idade reforma nee hanorin iha ensinu baziku no sekundariu jeral, professor sira nee kuaze ho idade 60 resin, tanba professor sira nee hatama ona sira nian reqerementu ba iha Ministeriu.

Nunee mos, Diretor edukasaun Munisipiu Ermera, Marcos Soares Martins, hatete, tinan nee professores sira neebe tama idade reforma iha eskola Munisipiu Ermera hamutuk 50 resin, sei tama idade reforma.

“Hau hanoin professores neebe atu tama idade reforma nee balun ho idade 60 resin no balun tanba kondisaun saude,numeru neebe mak ohin hau temi nee, hau hanoin sira nee mak sei tama idade reforma ninia,” katak nia.*

Reportajen: Jacinta Sequeira/Blandina Mauno
Editora: Carme Ximenes

LEAVE A REPLY

Please enter your comment!
Please enter your name here