DILI,STLNEWS.co – Atu redus numeru dezenpregu iha rai laran, mak oras nee daudaun nasaun barak presiza Timor oan sira neebe iha kualifikadu, liu-liu hatene lingua, tanba nee husu ba Timor oan sira nafatin aprende ema nia lian.
“Ita orgulhu tanba nasaun barak hahu loke sira nia odamatan ba Timor oan sira atu ba servisu iha sira nia rai, maibe importante ba ita mak nafatin aprende ema nia lian liu husi kursu oin-oin neebe loke ona iha rai laran,” kestaun nee fo sai husi Deputadu Domingos Carvalho ba STL liu husi telefone, Sesta nee (28/04/2023).
Nia mos husu ba Timor oan sira neebe tuir ona kursu atu nafatin aprende, bainhira merkadu rai liur husu karik hein ba deit. Maibe nafatin agradese tanba Timor oan barak mak servisu iha rai liur no kontribui ona reseitas mai kofre estadu no hadia mos sira nia ekonomia familia iha TL.
Iha parte seluk, Diretor Ezekutivu Luta Hamutuk, Jose Alves hateten, lo-loos governu tenki iha politika neebe diak dada investor sira mai investe iha rai laran hodi fo servisu ba Timor oan sira.
“Kada loron ita haruka Timor oan sai ba servisu iha ema nia rai, maibe iha ita nia rai laran domina ema estranjeiru sira, tanba nee governu foun mai tenki hanoin ona dada investor sira mai investe hodi loke kampu servisu ba sira neebe sei dezempregu hela,” dehan nia.
(mad)
