UNDIL-TT Asina Akordu Renovasaun Fornese Lina Internet

Universidade Dili (UNDIL) ho Timor Telecom halo renovasaun Akordo hodi fornese lina Internet (Wi-Fi) ba estudante sira hodi utiliza ba eskola online. (Foto: STL/Crisogono Magalhães)

DILI, STLNEWS.co – Universidade Dili (UNDIL) ho Timor Telecom halo renovasaun Akordu hodi fornese lina Internet (Wi-Fi) ba estudante sira hodi utiliza ba eskola online.

“Asina akordu ida ohin nee hanesan, halo asina renovasaun ba akordu neebe antes nee halao tiha ona,” dehan Reitor UNDIL Dr. Jose A. Belo, ba STL iha nia knaar fatin UNDIL, Maskarenhas, Sesta (05/02/2021).

Reitor UNDIL nee dehan, haree ba iha apoiu neebe durante Timor Telecom fo liu liu monta lina internet (Wi-Fi) hodi fasilita dosente no estudante sira hodi bele simu materia liu husi eskola online, dadaun nee UNDIL mos iha ona class masteradu i dosentes balu neebe hanorin class masteradu nee kuaze hela iha rai liur, nunee liu fasilidade internet neebe TT oferese nee bele fasilita ona aulas eskola online nian.

“Oras nee dadaun mos UNDIL iha ona class masteradu i dosentes sira neebe hanorin nee laos iha Timor oan deit iha mos dosente sira husi Japaun, Portugues no Indonezia tamba nee ho fasilidade internet neebe oferese husi Timor Telecom bele fasilita estudante sira atu eskola online,” hatete nia.

Nia haktuir, kooperasaun neebe UNDIL halo nee laos ho Timor Telecom deit, aleinde Timor Telecom iha mos ajensia balu, liu husi akordu neebe halo nee espera katak bele halo prosesu aprendizajen nee bele lao efektivu.

“Espera katak iha situasaun ida nee, liu husi renovasaun akordo ho Timor Telecom bele fasilita lina Internet ba estudante, dosente no estrutura reitoria bele halao nia knaar ho diak liutan, tanba ita hatene iha tempu ida agora lina internet nee sai hanesan nesesidade prima iha prosesu aprendizajen eskola online, nunee ohin ita reativa hikas akordu kontinuasaun ho Timor Telecom,” haktuir nia.

Nia hatete, hanesan Reitor nia apresia tebes ho renovasaun akordu nee, tamba wainhira estudante sira atu simu materia husi dosente sira husi rai liur fasil ona tamba ita iha ona lina internet neebe TT oferese, nunee bele aselera lalais ita nia prosesu aprendizajen.

“Objetivu husi akordu neebe UNDIL halo ho Timor Telecom maka, oinsa Timor Telecom bele ajuda estudante sira liu-liu monta lina Internet (Wi-Fi) iha Kampus UNDIL, nunee bele fasilita estudante sira bele aprende ho diak liutan, wainhira sira iha aulas eskola online nian,” tenik nia.

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here