UNITAL Halao Prosesu Aprendizajen Uza Sistema Online

Foto: Espesial

DILI, STLNEWS.co – Fakuldade Engenaria Universidade Oriental Timor Lorosae (UNITAL), halao ona prosesu aprendizajen liu husi sistema online hanesan zoom, whatsapp, google clasroom no video tutorial.

Dekanu Fakuldade Engenaria Universidade Oriental Timor Lorosae (UNITAL), Juvinal Ximenes Guterres hatete, iha loron 08 fulan Marsu 2021, wainhira rona informasaun katak, planu governu atu halao serka sanitaria iha munisipiu Dili, entaun iha momentu nee kedas senadu universidade desidi hodi orienta ba dosente sira utiliza media online hodi halao prosesu aprendizajen.

“Maneira seluk atu halao prosesu aprendizajen liu husi online hanesan zoom, whatsapp group, google clasroom no video tutorial. Maibe sei iha difikuldade balun mak ita hasoru. Hanesan rede internet ladun lao diak, estudante balun seidauk iha fasilidade hanesan laptop no telefone neebe sufisiente atu asesu ba aprendizajen online,” hatete Juvinal ba STL, liu husi telefone, Kuarta (17/03/2021).

Nia hatutan, depois rona tiha katak serka sanitaria sei estende, entaun senadu universidade desidi tan desizaun balun mak hanesan estrutura senadu universidade husi Reitor too Direitor Departamentu halao knaar ho shift 2 mak hanesan shift 1 primeiru hahu tuku 09.00 too 12.00 no shift loraik hahu husi tuku 14.00 too 17.00.

Nia afirma, iha mos fasilidade neebe universidade prepara tuir regras neebe mos fo sai ona. Tenki tau maskra, distansia sosial, fase liman beibeik ho sabaun, ida-idak lori hand sanitizer. Salarariu dosente lao normal hanesan bainbain.

Konaba estudante balun laiha fasilidade hanesan leptop no telefone, dosentes da materia ida-idak buka meius hodi nunee sira bele hetan hotu.*

Reportajen: Blandina Mauno
Editora: Carme Ximenes

LEAVE A REPLY

Please enter your comment!
Please enter your name here