UNPAZ Fo Bolsu Estudu Ba Estudante

Reitor Universidade da Paz (UNPAZ) Adolmando Soares Amaral hatete, tinan 2021 fo bolsu estudu ba estudnte nain 14, tanba sira presiza tulun husi Universidade. (Foto: Espesial)

DILI, STLNEWS.co – Reitor Universidade da Paz (UNPAZ) Adolmando Soares Amaral hatete, tinan 2021 fo bolsu estudu ba estudante nain 14, tanba sira presiza tulun husi Universidade.

Nia dehan, UNPAZ tinan-tinan sempre kontribui fo bolsu estudu ba estudante sira, liu-liu ba sira neebe universidade haree katak, sira presiza tulun husi universidade nian.

“Tanba nee mak tinan ida nee ami iha bolsu estudu lubuk ida hanesan, bolsu estudu nivel doutoramentu ema nain 4, lisensiatura pur volta nain 6, husi numeru 4 oferese ba PNTL restu ba dosente no estudante sira,” dehan nia ba STL, iha knaar fatin UNPAZ, Tersa (26/01/2021).

Nia hatutan, ba sira neebe doutoramentu ho mestradu kontinua iha Indonezia no Filipina.

Nia afirma, relasiona ho situasaun Covid-19 too agora seidauk hetan notifikasaun husi governu, liu-liu MESSK atu bele hapara atividades, maibe ministru rasik hatete, atividade ensinu superior tenki lao nafatin, agora protokolu ba saude atu prevene Covid-19, maka instituisaun ida-idak tenki prepara kondisoes ba ninia estudante, funsionariu no dosente sira hotu.

Relasiona observasaun neebe bolseiru barak remata estudu maibe laiha kampu traballu, Reitor nee hatan ita fo bolsu estudu para ema atu aumenta kuinesementu iha Siensia no Teknolojia.

Depois nia fila mai depende merkadu maka tenki defini katak, merkadu bele hatan no responde ba siensia no teknolojia neebe nia aprende ka lae.

“Ita nasaun kiik, depois ita nia kondisoes kampu traballu limitadu, maibe ita tinan-tinan halo hela produsaun ba rekursu,” tenik nia.

Aliende nee governu rasik reformasaun ba ema sira neebe mak atinji idade 60 ba leten maibe sira sei kontinua servisu.

Tanba nee maka setor privadu sira seidauk hola papel importante ida para oinsa atu bele ajuda governu, atu redus programa kona ba dezempregu, sira lakoi halo reinvestimentu ba sira nia atividade iha setor produtivu sira para ajuda governu bele hatan rekursu sira neebe mak tinan-tinan ita gradua hela.

Nunee sai preokupasaun ba governu, setor privadu no mos ensinu superior sira hotu, tanba kada tinan produs, prense ba bolsu estudu maibe tenki utiliza ema sira nee, no prepara kondisoens.

Tanba nee bolseiru sira mos labele depende deit ba governu ita husu mos setor privadu sira tenki hola papel importante para ajuda atu rezolve problema governu, liu-liu kria hamenus numeru dezempregu liu husi reinvestimentu ba sira nia atividade iha setor produtivu sira loke tan kampu traballu barak para timor oan sira bele asesu iha neeba.*

Reportajen: Blandina Mauno
Editora: Carme Ximenes

LEAVE A REPLY

Please enter your comment!
Please enter your name here