UNPAZ Sei Lahamosu Fakuldade Edukasaun

Reitor Universidade Da Paz, Adolmando Soares Amaral. (Foto: STL)

DILI, STLNEWS.co – Universidade Da Paz (UNPAZ), sei lahamosu tan Fakuldade Edukasaun, tanba lakoi atu kompete ho universidade neebe iha ona Fakuldade Edukasaun.

Kestaun nee hatoo husi Reitor Universidade Da Paz, Adolmando Soares Amaral liu husi nia diskursu, iha UNPAZ, Dili, Segunda (22/02/2021).

Adolmando hatete, Ensinu Superior ida mak loke tan Fakuldade ida nee, entaun Ensinu Superior seluk labele loke tan Fakuldade seluk para atu halo hodi kompete, hanesan kompetisaun ba merkadu neebe mak melhor, ho programa estudu neebe mak hanesan, nee la fo oportunidade ba Ensinu Superior sira neebe mak iha ona atu organiza an.

“Ezemplu institutu superior Cristal, agora iha Fakuldade ona edukasaun, tanba sira loke antes tiha ona, see ita hamosu tan Fakuldade Edukasaun iha UNPAZ, nee ema mai hotu UNPAZ ema la ba Cristal, ema la ba DIT,” tenik nia.

Reitor Adolmando hateten, tanba ida nee mak halo estratejia ida, imi iha ona, UNPAZ hamosu foun, wainhira hamosu fakuldade foun imi labele hamosu anunsiu hotu merkadu ida-idak nian, Ensinu Superior 16, depois programa estudu neebe mak hanesan, enkuantu limitasaun ba fasilidade, de rekursus atu garante kualidade nee oinsa.

“Ita boot sira iha ona foti hodi garante kualidade, no ida neebe mak imi la iha UNPAZ foti foun hodi garante kualidade, neebe hotu-hotu nia preokupa mak atu garante kualidade enkoraja malu tau atensaun masimu, ba povu, hodi dezenvolve rai ida nee,” nia esplika.

Nia salienta, laos atu loke para halo kompetisaun hodi buka kualidade nee lae, liu husi meius ida nee mak razaun fundamental, neebe Universidade Da Paz sei la hamosu tan Fakuldade Edukasaun iha nee.

“UNPAZ agora iha fakuldade 6, no programa de estudu 20, mais barak mak seidauk akreditada, tanba nee mak hanoin sira nee hotu UNPAZ sei la hamosu tan fakuldade edukasaun,” dehan nia.

Reportajen: Maria Tavares
Editor: Carme Ximenes

LEAVE A REPLY

Please enter your comment!
Please enter your name here