2021 EDTL Sei Dada Eletrisidade Ba Suku Hamutuk 31

Prezidente Konsellu Administrasaun Eletrisidade de Timor Leste Empresa Publika (EDTL, E.P.), Paulo Da Silva. (Foto: STL/Alberto Menezes)

DILI, STLNEWS.co – Governu liu husi Eletrisidade de Timor Leste Empresa Publika (EDTL, E.P.), planu ona iha tinan nee 2021 nee atu dada tan eletrisidade ba suku hamutuk 31 iha teritoriu laran.

Kestaun nee husi Prezidente Konsellu Administrasaun Eletrisidade de Timor Leste Empresa Publika (EDTL, E.P.), Paulo Da Silva, wainhira hasoru Primeiru Ministru (PM) Taur Matan Ruak iha Palasiu Governu, Kinta nee (18/02/2021).

“Primeiru Ministru (PM) Taur Matan Ruak bolu ami atu aprezenta konaba planu Eletrisidade de Timor Leste Empresa Publika (EDTL, E.P.), nomos rona orientasaun husi Xefe Governu oinsa ba oin atu halo serbisu ho diak iha tinan ida nee nomos tinan oin,” informa Prezidente EDTL, E.P., Paulo Da Silva iha Palasiu Governu.

Nia dehan, iha Timor Leste suku hamutuk 60 seidauk asesu ba eletrisidade, tanba nee iha tinan nee sei kobre uluk suku 31.

“Ita iha total 60 suku seidauk asesu ba eletrisidade, entaun tinan ida nee ita tenki responde uluk suku balun komforme ita nia orsamentu neebe tau iha planu, pelumenus kobre 31 suku hanesan nee, no fatin balun iha kapital Dili,” tenik nia.

Nia dehan, dadaun nee EDTL iha ona orsamentu no dezenu konaba atu implementa projetu dada eletrisidade ba suku hamutuk 31.

“Orsamentu neebe atu implementa ba projetu nee hamutuk tokon US$11 i tal ba fatin sira nee, maibe ami sei haree fila fali, tanba orsamentu neebe aloka ona nee iha Diresaun Jeral nia tempu, agora EDTL hanesan empreza ida nia iha standar rasik ho responsabilidade ida oinsa halo kalkulasaun ba orsamentu hotu, hodi nunee ita bele poupa no uza ba problema barak neebe EDTL hasoru,” hakotu nia.

Reportajen: Alberto Menezes
Editor: Ekipa STL

LEAVE A REPLY

Please enter your comment!
Please enter your name here