2021 SERVE Kompleta Sukusal Iha Munisipiu 3

Direitor Ezekutivu SERVE, Florencio Sanches. (Foto: STL/Jacinta Sequeira)

DILI, STLNEWS.co – Planu prioridade Servisu Rezistu Verifikasaun Emprezarial (SERVE) tinan 2021 nee, maka atu kompleta sukusal SERVE nian iha munisipiu tolu, Ermera, Liquisa no Manatuto, tan nee SERVE haruka ona karta ba Prezidete Funsaun Publiku atu halo rekrutamentu ba funsionariu sira.

“Ami nia planu prioridade ba tinan nee maka, atu kompleta sukusal SERVE nian iha Munisipiu tolu neebe mensiona, no ema neebe atu servisu iha sukusal nee, parte funsaun publiku maka bele halo rekrutamentu, tan nee husu ba joven sira atu prepara aan hodi kompete iha vaga nee,” kestaun nee fo sai husi Diretor ezekutivu SERVE, Florencio Sanches ba STL Kuarta (27/01/2021) iha nia knaar fatin Bairopite.

Nia mos afirma liu tan katak, planu ida seluk maka SERVE sei servisu makas liu tan hodi hadia prestasaun servisu husi rekursu umanus, tan nee SERVE sei tur hamutuk hodi forma ekipa ida hodi halo avaliasaun ba dezempenu ba funsionariu hotu-hotu atu nunee atendimentu ba funsionariu sira tenke ho lolos, tanba Serve hanesan institute publiku, atendimentu ba povu tenke diak.

“Hau hanoin servisu nia planu prioridade maka tenke hadia rekursu umanus no loke tan sukusal iha Munisipiu 3 nee hodi kompleta ezistensia SERVE nian iha teritoriu tomak, ho nunee bele hasae numeru empreza sira nian, tanba agora numeru empreza sira nee tama ona ba rihun tolu nulu resin rua, no tinan ida nee ita bele hasae ba rihun lima,” dehan Diretor Ezekutivu nee.*

Reportajen: Madalena Horta/Jacinta Sequira
Editor: Ekipa STL

LEAVE A REPLY

Please enter your comment!
Please enter your name here