DILI, STLNEWS.co – Abertura Kampanha FRETILIN iha Munisipiu Baukau, Postu Administrativu Vamase, halo negosiante sira kontenti tanba sasan folin.
Negosiante Francisca Coreia da Silva hatete ba STL iha nia knaar fatin Aldeia Loro, Suku Vemase, Postu Administrativu Vemase, Munisipiu Baukau, Kuarta nee (19/04/2023).
Nia hatete, senti kontenti tanba katupa no ikan neebe mak sira faan ema sosa hotu.
“Ami senti kontenti tanba ami nia katupa folin, loron bailet ami faan ema la hola, anaunser ema ba lia ruma mak foin husi nee hola, se lia ruma laiha ami nia katupa ema la hola, rai tomak ami mak han deit,” katak negosiante nee.
Negosiante nee haktuir, sira senti kontenti tanba katupa no ikan neebe mak sira faan iha estrada ibun, partisipante sira neebe partisipa iha abertura kampanha FRETILIN nian sosa hotu.
“Katupa no ikan nee ami faan hola tutan fali, foos nee hola iha loja, ikan balun kail rasik deit no balun hola iha Laga, maibe barak liu nee hola tutan,” dehan nia.
Nunee mos negosiante Domingas Kelu hatutan, nia senti kontenti tanba hahan neebe mak sira faan ema hola diak kompara ho tempu baibain.
“Ami senti kontenti, tanba kampanha FRETILIN nia iha nee sira mai han iha ami nia fatin, entaun ami senti kontenti, tanba ami nia katupa ho ikan ema hola hotu, baibain nee ema la hola hanesan nee,” katak nia.
Nia akresenta, kada loron sira faan maibe ema hola la hanesan ho horiseik no ohin, tanba baibain diak ida ema hola mak US$ 5, maibe komparasaun ho loron Tersa kalan no loron ida nee (Kuarta) ema hola diak, osan sufisiente hodi sustenta familia ba loron balun.
Tuir observasaun neebe mak STL hetan, sasan neebe mak negosiante sira faan iha Kairabela mak hanesan ikan, katupa, bee agua, Dosi no hahan seluk tan.
(eme)
