Afoloicai Husu Governu Tau Matan Ba Estudante

Xefe Suku Afaloicai, Constantinho Guterres. (Foto: STL/Emerenciana Pinto)

DILI, STLNEWS.co – Xefe Suku Afoloicai, Postu Administrativu Uatulari, Munisipiu Viqueque, Constantinho Guterres husu ba Governu, atu tau matan ba estudante Afoloicai oan sira neebe hela iha Dili.

Xefe Suku hatoo kestaun nee relasiona ho serka sanitaria neebe implementa husi Governu, hodi taka dalan husi munisipiu ba kapital Dili no husi kapital Dili ba munisipiu. Tanba estudante sira hela iha Dili, labele simu hahan husi inan ho aman husi foho.

“Ami hanesan Xefe Suku ami preokupa lahalimar, tanba estudante sira neebe agora dadaun hela iha Dili, agora dadaun iha tempu lockdown, tanba nee ami hatoo alternativu oinsa Governu buka meius, fo atendementu ba ita nia estudante sira neebe mak hela iha Dili,” hatete Constantinho.

Konaba deklarasaun neebe mak iha katak, Governu liu husi Ministeriu Solidaridade Sosial no Inkluzaun (MSSI) sei fo apoiu ba estudante neebe hela iha kos deit, Xefe Suku nee hatete, Governu presiza tetu didiak tanba serka sanitaria laos ba estudante neebe mak hela kos deit, maibe impaktu hotu ba estudante neebe hela iha Dili, familia labele apoiu hahan ba sira tanba dalan taka.

“Ida nee Governu presiza hanoin didiak tanba kestaun nee laos haree deit ba estudante neebe mak hela iha kos, maibe konta hotu ema neebe mak hela iha Dili nee defikulta no preokupa hotu, tanba nee governu presiza hanoin alternativa neebe diak, nunee ema hotu neebe presiza nesesidade nee Governu buka meius ajuda hotu,” hatete Autoridade Lokal nee.

Autoridade lokal nee hatutan, iha lockdown ou serka sanitaria, dalan taka husi munisipiu ba kapaital no kapital ba munisipiu nee sai preokupasaun boot, tanba inan aman labele haruka osan ou hahan ba estudante sira iha tempu defisil nia laran, tanba nee mak governu presiza tau atensaun seriu ba ida nee.

“Agora dalan taka hotu ida nee sai preokupasaun boot tanba estudante sira atu foti hahan husi inan aman mos ladiak, tanba nee mak tuir ami nia hanoin alternativa governu tenke buka oinsa apoiu aihan ruma kada loron tanba sira dook husi inan aman” tenik nia.

Nunee mos estudante Afoloicai, Lourdes Trindade hatutan, durante Governu implementa lockdown ou serka sanitaria hodi taka dala husi munisipiu mai Dili, ida nee sai preokupasaun boot ba sira, tanba laiha hahan ba sira atu han no sira labele hola sira nia presiza tanba laiha osan.

“Dalan taka entau ami labele simu hahan ruma husi inan aman, iha foho ba ami no ami labele hola nesesidade ruma neebe mak ami presiza tanba laiha osan,” hatete nia.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here