DILI, STLNEWS.co – Autoridade Inspesaun Fiskalizasaun Ekonomia Sanitaria no Alimentar (AIFAESA) kontinua halo kontrolu ba sasan neebe faan iha loja liu ona prazu.
“Hau hanoin lei fo biban ba AIFAESA atu divulga informasaun, tan nee ami nafatin fahe informasaun ba publiku, liu-liu autor ekonomia sira atu haknaar aan ho diak, hodi partisipa iha prosesu dezenvolvimentu liu husi kumpri Lei, katak labele faan sasan neebe liu ona prazu, se lae fo impaktu ba konsumidor sira nia saude,” kestaun nee fo sai husi Inspetor AIFAESA, Ernesto Monteiro ba STL iha nian knaar fatin Matadoru, Dili, Segunda nee (01/08/2022).
Nia afirma liu tan, autor ekonomia sira nee barak mak kumpri ona lei, katak sasan liu prazu la faan tan ona iha sira nia loja.
Iha parte seluk, reprezentante povu iha uma fukun Parlamentu Nasional, Deputadu Antonio da Conceicao hatutan, governu liu husi AIFAESA nia papel mak atu halo kontrolu ba sasan folin iha rai laran, no mos halo kontrolu ba sasan neebe liu ona prazu.
“Hau hanoin knaar governu nian tenki kontrola, atu nunee loja nain sira labele manipula ka faan sasan neebe liu ona prazu, karik sasan liu prazu bele lori ba fakar iha lixu Tibar, kuandu sei faan nafatin tenki selu multa,” dehan deputadu nee.
(mad)
