VIKEKE, STLNEWS.co – Reprezentante Autoriedade Nasional Petroleu no Minerais (ANPM), Evita Barreto Abrantes Ofisial Konteudu Lokal hatete, hafoin halao vizita ba grupu 4 hortikultura iha Beaco, husi grupu 4 nee, iha grupu ida mak seidauk bele implementa nia atividade tanba udan.
“Bazeia ba hau nia observasaun katak, husi grupu 3, hanesan Grupu Buka Rasik, Grupu Moris Hamutuk ho Grupu Haburas Rai, mak implementa ona projetu hortikultura,” dehan Evita Barreto Abrantes Ofisial Konteudu Lokal ba jornalista sira iha Beaco, Vikeke, Kinta nee (13/4/2023).
Nia haktuir, atividade neebe mak Grupu 3 nee halo mak hanesan kuda modo sira, porezemplu mostarda, kanko, kovi, brinjela, tomate, aimanas, alfase no seluk-seluk tan.
Nia relata, rezultadu husi atividade nee hafoin kuda tiha modo, bainhira too tempu kolheita modo sira nebee mak grupu kuda maizumenus sira koilheta dala 2 ka dala 3.
“Ezemplu, Grupu Buka Rasik nian nee, sira faan ba komunidade sira nebee mak hela iha Beaco nomos kontribui ba merenda eskolar. Nee hatudu katak, atividade nia rezultadu fo duni benefisiu direta ba grupu sira hodi hetan rendimetu ruma ka hadia ekonomia grupu sira nian. Hau espera katak, grupu sira nafatin mantein sira nia badinas, vontade diak, esforsu, no servisu hirak nee hodi bele garante sustentabilidade ba sira nia atividade hortikultura nian iha futuru,” dehan nia.
Ofisial Konteudu Lokal nee katak, ba oin sira sei estuda no avalia konaba kompromisu Konteudu Lokal husi grupu 4 iha Beaco. Apoiu neebe mak fo ba grupu 4 iha Beaco nee, nudar kompromisu Konteudu Lokal husi Kompanhia Carnarvon Petroleum, LTD.
(cri)
