Apoiu Umanitariu Husi Japaun Too Ona TL

DILI, STLNEWS.co – Aviaun Tri-M.G Asia Airlines ho marka PK-YHG, Domingu lokraik nee mais ou menus tuku 15:00 otl too ona iha Aeroporto Internasional Nicolau Lobato, lori apoiu umanitaria husi governu Japaun hanesan manta hamutuk rihun 5 (5.000) hodi apoiu ba populasaun sira neebe afeitadu husi inundasaun.

Hafoin entrega apoiu nee ba governu Timor Leste, Charge d’ Affairs ad Interm Embaixada Japaun iha Timor Leste, Hirashima Shusaku hateten, iha semana kotuk TL hasoru dezastre naturais ida neebe boot tebes, tanba nunka akontese durante decade barak.

“Tanba nee iha loron 8 fulan Abril governu TL halo pedidu hodi husu apoiu internasional nian hodi responde ba dezastre naturais, nunee governu Japaun deside hodi oferese manta besik rihun 5 (5000), nuudar ajuda emergensia liu husi Agensia Kooperasaun Internasional Japaun (JICA) ba Timor Leste hodi responde ba estragus kauza husi inundasaun,” dehan Hirashima Shusaku liu husi nia deskursu iha Aeroporto Internasional Nicolau Lobatu, Domingu (11/04/2021).

Tuir nia, governu Japaun ativamente hola parte iha kooperasaun no koordenasaun hamutuk ho komunidade doadores no govemu Timor Leste iha esforsu asistensia nian. Japaun hamrik firme hodi prontu konsidera asistensia saida deit mak nia bele oferese tuir mai, hodi ajuda Timor Leste rekopera husi dezastre no harii futuu ida neebe mak nabilan liuba povu TL.

Foto: STL/Donaciano Magalhães

“Ami espera katak asistensia ida nee sei ajuda hakmaan netik vitima sira husi inundasaun nee,” tenik nia.

Nia hatutan, haree husi perspetiva umanitaria nian governu Japaun iha relasaun neebe besik ho Timor Leste. Tanba nee Japaun foti ona desizaun atu fornese assistensia emerjensia nian ba Timor Leste atu suporta vitima inundasaun sira.

Tinan sanulu liu ba Japaun hasoru ona dezastre ida ho eskala sem presedentes, rai nakdoko boot iha Leste Japaun. Timor Leste hatudu ninia solidaridade no amizade ba Japaun liu husi doasaun ho montante millaun ida dolares amerikanu. Nunee presiza mos governu nia tulun hodi ajuda povu TL.

Iha fatin hanesan Sekretariu Estadu Protesaun Sivil (SEPS), Joaquim Gusmão dehan, governu Timor Leste agredese apoiu umanitaria neebe apoiu husi governo no povu Japaun.

“Lori governu Timor Leste nia naran hatoo agradese boot ba governu no povu Japaun neebe mak bele organiza apoiu humanitaria nee bele too Timor Leste hodi responde ba dezastre naturais neebe akontese,” dehan Joaquim.

Enkuantu antes nee dadus neebe aprezenta husi SEPS ba KM relasiona ho dezastre naturais neebe akontese iha loron hirak liu ba konsege hamate ema nain 42 no rihun 10 mak lakon sira nia hela fatin.

Dezastre naturais nee hamate ema nain 22 husi Dili,10 husi Ainaro, 5 husi Manatuto, nain 3 husi Viqueque, no nain 2 husi Aileu.*

Reportajen: Alberto Menezes
Editora: Domingas Gomes

LEAVE A REPLY

Please enter your comment!
Please enter your name here