DILI, STLNEWS.co – Tuir eis Prezidente Parlamentu Nasional (PPN), Deputadu Arão Noe, konsidera OJE 2020 nee planu ambisaun. Nia dehan, tanba orsamentu tinan 2020 nee orsamenu ida neebe atu ezekuta deit dentru fulan 2.

Maibe governu husu tokon $1.400 katak, tokon $900 atu ezekuta iha fulan 2 nia laran. “Hau hanoin katak, planu ba orsamentu tinan 2020 nee planu ambisaun ida. Maibe laos bazeia ba realidade no laos bazeia ba tempu neebe maka atu ezekuta,” dehan nia ba jornalista sira iha PN, Kinta (01/10/2020).

Nia informa, orsamentu duadesimal tuir relatoriu neebe iha durante besik fulan 10 foin ezekuta ka gatsa deit tokon $500 inklui ho komprimisiu sira ba too tokon $600 entaun, ida nee hatudu katak fulan 2 ba oin nee atu gasta tokon $900.

Nia tenik, depois iha kapital dezenvolvimentu mais tokon $200 entaun, kapital dezenvolvimentu atu ezekuta nee presiza tempu para atu halo tender liu husi prosesu sira nee hotu presija fulan 3 minimu.

“Maibe dentru husi fulan 2 hau fiar katak, prosesu tender sira hotu sei la halao, no hau fiar katak sei la ezekuta nein atu too 50% tan karik,” tenik nia.

Nia salenta, tanba ano fiskal husi loron 1 fulan Janeiru too loron 31 fulan Dezembru labele diminui, sae tan ita nia sistema hatete katak loron 15 fulan Dezembru tenke taka ona sistema aprovizonamentu sira entaun tempu limitadu teb-tebes atu halo prosesu.

Nia afirma, tinan 2020 nee orsamentu atu kompleta deit fulan rua nee tau deit ba iha prioridade sira hanesan salaraiu invesimentu, bens servisu trasferensias, para selu ema nia diretu ou ba kapital sira neebe kiik oan la presiza foti osan ho fundu too tokon $1.400.

Ba tinan 2021 maka ita tau planu ida konkretu atu bele foti osan sira nee. Maibe agora ita foti osan ho montante ida tokon $1.400 lori mai ita la ezekuta depois husik hela osan nee iha fundu neeba nee impaktu ba iha ita ninia fundu nee rasik.

“Tanba nee maka hau ninia pozisaun hau kontra, pozisaun ida atu halo planu orsamentu ida ho orsamentu boot, so para atu ezekua iha fulan 2 deit. No hau fiar katak sei la halo buat ida tanba, prosesu ba ita nia lei aprovizonamentu lei orsamentu jestaun finanseira fo tempu para atu bele prosesu sira nee tenke lao.

Ezemplu hanesan prosesu tender, ba kapital menor no kapital dezenvolvimenu presiza tempu para prosesu tender sira nee lao. Nia hatutan, iha prosesu ida nee haree katak iha violasaun balun neebe makas. ezemplu tuir lei orsamentu jestaun finanseira hatete katak, orsamentu duadesimal so para bele uza ba buat 2 deit maka salariu vensimentu, bens servisu ho transferensias. Laiha kapital menor no laiha kapital dezenvolvimentu.

Nia hakotu, durante nee buat sira nee lao hela hotu maibe, ida nee tuir lolos labele.

“Tanba nee maka ami dehan katak, violasaun tuir regras ba lei orsamentu jestaun finanseira,” hakotu nia.

Reportajen: Domingas Soares/Guilhermina Franco

Editor: Ekipa STL

LEAVE A REPLY

Please enter your comment!
Please enter your name here