Armajen Mamuk, Loja Nain Sosa Fos Limitadu

Foto: Espesial

DILI, STLNEWS.co – Loja nain neebe mai husi munisipiu atu sosa fos iha armajen perisos tenke limitadu tanba foos laiha.

Loja nain naroman, husi munisipiu Baucau, Agostinho Fernandes, hatete, durante semana ida nee nian laran, maibe tempu uluk sira tula fos 10 saka, loron ida ema bele sosa hotu, tanba orsamentu nee lao diak, no populasaun sira mos hetan osan, tempu agora orsamentu laiha, ho ida nee, konsumedor sira mos kada loron, ladun sosa sira nian sasan hanesan uluk.

“Fos iha nee menus ona, maibe ninia folin nee, ami hola fos 25 kg ho folin 13 dolar 50 cent, ami ba faan fali iha munisipiu ho folin 14 dolar 50 cent, fos 30 kg, ami sosa iha nee 15 dolar, ami ba faan fali iha Munisipiu ho presu 15 dolar 50 cent, tuir ami nian presu neebe mak ami fo ba ami nian konsumedor sira, maibe ami lori ba iha neeba, maibe dala ruma ita nian konsumedores sira osan laiha, ami mos defisil uituan atu sosa sasan, tanba nee rendimentu agora dadaun la hanesan ho tempu uluk nian, kada loron ami hetan mais ou menus, sasan kareta isin ida, ami tula fos saka 10, ami hetan deit 60 dolar ou 50 dolar,” dehan Agostinho ba STL, iha armajen perissos Fatuhada, Dili, Tersa (23/02/2021).

Agostinho, husu ba governu, sebele loke netik projetu, atu nunee osan nee ba povu, para konsumedor sira bele sosa sasan, maibe dadaun nee, fos iha armajen mamuk, hanesan media sira mos dadaun haree, fos iha armajen laiha hotu.

“Ami mai mos hein deit hanesan nee, tanba ami mai sosa fos mos, nain ba armajen sira mos fo terbatas ba ami, dala ruma ami husu fos saka 100, maibe sira fo deit 20 ou 30, tanba sira dehan, agora fos iha armajen nee laiha no hotu, neebe sebele karik, fo hatene ba ita nian governu, ajuda importa netik fos mai, para ami bele sosa, laos governu atu fo deit ami, maibe ami atu sosa, atu nunee lor-loron nee ami bele aguenta netik ami nian moris, liu-liu ami neebe mak halao hela ami nian negosiu,” dehan nia.

Nia sublina, sasan hirak neebe mak sira sosa iha armajen sira tenke lori ba faan fali iha munisipiu, maske konsumedor sira ladun sosa sasan, maibe sira kontinua faan nafatin, para konsumedor balun neebe mak hakarak atu sosa sasan, sira prontu tula sasan ho kareta para tama sai iha bairo.

“Ami nian rendimentu menus, maibe bainhira ami mai sosa ona sasan iha nee, lori ba fali iha Munisipiu, ami tula iha kareta ami ba faan fali tama sai komunidade sira nian bairo, para ita nian maluk sira neebe mak atu sosa karik, ami tenke lori sasan sira nee ba faan,” tenik nia

Iha fatin hanesan, bainhira STL tenta atu halo intervista ho manajer armajen Perissos, maibe ninia parte la fo komentariu ba media, tanba la hetan autorizasaun husi nain ba armajen refere.*

Reportajen: Jacinta Sequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here