DILI, STLNEWS.co – Reprezentante povu iha uma fukun Parlamentu Nasional (PN) husu ba governu foun, atu kontrola atividade komersial neebe lao iha rai laran, domina ema estranjeiru sira.
“Husu ba governu neebe mai atu kontrola didiak atividade komersial neebe lao iha rai laran, domina ema estranjeiru sira hahu husi negosiu kiik too negosiu boot, domina ema estranjeiru, no taka dalan ba Timor oan sira,” kestaun nee fo sai husi Deputadu David Dias Ximenes ba STL liu husi telefone, Kinta( 29/06/2023).
Nia afirma, triste tebes bainhira haree atividade komersial domina ema rai liur, serake Timor oan laiha kbiit atu halo negosiu ka oinsa, tan nee governu foun mai tenki haree kestaun nee, halo negosiu kiik iha lisensa ka lae, karik laiha lisensa saida mak governu bele halo.
Iha parte seluk, Diretor Servisu Rejistu Verikasaun Emprejarial (SERVE), Florencio Sanches hateten, los duni atividade komersial neebe lao iha rai laran domina tebes ema estranjeiru sira, tanba nee husu molok atividade komersial nee atu lao mak tenki ba rejistu uluk lai iha SERVE, no hetan ona lisensa ruma.
“Ami apela ba maluk sira neebe halo negosiu laiha lisensa husi SERVE mak nia sei hetan multa US$ 30 mil, tanba nee diak liu mai rejistu ho gratuita, duke viola regra selu fali tan multa,” dehan diretor nee.
Nia afirma, negosiante sira neebe halo negosiu iha rai laran no la hetan legalidade husi SERVE, mak nia sei hetan multa US$ 30 mil. Tanba nee, husu ba sidadaun sira neebe halo negosiu maibe seidauk rejistu nee, diak liu hakbesik aan ba iha sukursal neebe besik, atu nunee bele rejistu, se lae mak sei kona multa US$ 30 mil.
(mad)
