Benefisiariu Kestiona Sistema MTCI Ba Distribuisaun Sesta Bazika

DILI, STLNEWS.co – Benefisiariu iha Suku São Jose Ai-mutin kestiona ho sistema husi Ministeriu Turismu, Comersiu, no Industria (MTCI), ba distribuisaun programa sesta bazika, tanba diferentes ho benefisiariu neebe antes nee simu ona aihan sesta bazika.

Tuir benefisiariu Aldeia São Jose Ai-mutin, Januario Nobre katak, iha komunidade barak mak lasatisfas ho sasan neebe mak simu, tanba husi MTCI hatete katak iha sistema foun, tanba nee lahanesan uluk, kompara ho uluk uza sistema voucher, maibe ida agora uza sistema cabases, nunee benefisiariu halo komparasaun antes nee, benefisiariu sira rasik mak ba foti sasan iha super merkadu direitamente, nunee kompara sasan nee barak liu.

“Ami haree fali ba cabases neebe mak ami simu lakondis ho osan nia folin, iha sasan balun lakompletu iha balun menus liu, tanba nee mak iha komunidade balun lasatisfas ho sistema nee,” dehan benefisiariu nee ba STL, iha Aldeia São Jose Ai-Mutin Dili, Kinta, (06/05/2021).

Nia dehan, sira observa antes nee iha benefisiariu sira simu nee osan ho montante $50 kada voucher, maibe haree fali ba sistema Cabases nee dalaruma lakondis ho sasan neebe mak iha.

“Ho ida nee mak ohin komunidade barak kestiona konaba sasan sira nee, tanba sasan nee nia folin lahanesan ho sasan neebe faan iha loja,” nia sublina.

Tanba nee, sira husu ba kompania no parte relevante atu distribui sesta bazika ba benefisiariu sira tenki iha balansu ka hanesan, atu labele iha parte balun simu, iha parte balun oin seluk.

Hatan ba preokupasaun nee, Xefe Gabinete MTCI, Maeni Calado hatete, komunidade sira iha direitu atu hato sira nia satisfasaun kritika ruma, nunee ministeriu akomoda ida nee.

“Hakarak atu hatoo ba komunidade sira katak Ministeriu uza ona padraun ka ou estandar ba numeru neebe mak kontratu ho kompania fornesedor sira, tanba nee kompania tenke kompleta deit ho item sira neebe mak prense iha laran,” nia informa.

Maibe sasan nia kualiadade ida nee ministeriu tau nafatin atensaun, katak nia tenki prense duni $50 neebe mak benifisiariu sira nia direitu, ida nee ministeriu tau atensaun.

“Sasan sira nee molok atu lori mai ita nia kompania, primeiru ita nia kompania fornesedor sira sei lori ba iha ministeriu atu haree katak sasan sira nee tuir lista ou lae,” dehan nia.

Total benefisiariu neebe simu sesta bazika iha aldeia São Jose Ai-mutin hamutuk atus lima rua nulu resin ualu (528). Tuir observasaun STL nota iha terrenu, benefisiariu neebe simu sesta bazika iha aldeia refere, benefisiariu kuaze uza maskra, maibe lakumpre distansiamentu sosial.*

Reportajen: Santina Castro
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Harii Federasaun Tenke Prepara Kondisaun

DILI, STLNEWS.co - Sekretariu Estadu Juventude No Desportu (SEJD), hatete harii federasaun tenke prepara mos kondisaun hanesan tenke iha atleta no treinador rasik. Lia hirak...

SEJD Enkontru Ho Lider Artemarsiais

DILI, STLNEWS.co - Sekretariu Estadu Juventude no Desportu (SEJD), halao enkontru ho lider artemarsiais sira iha Timor Leste, kona ba rekezitus artemarsiais nian neebe...

Lori Maromak Nia Domin Ba Ema Hotu

DILI, STLNEWS.co - Nuudar sarani neebe diak iha moris, tenke sai valeta ba ema hotu, atu lori Maromak nia grasa no domin ba maun...
%d bloggers like this: