Benefisiariu Lakumpri Regras

Maski iha situasaun pandemia Covid-19 nian laran, maibe benefisiariu sira neebe forma simu aihan sesta bazika, lakumpri distasiamentu sosial hanesan fase liman no uza maskra. (Foto: STL/Jacinta Sequeira)

DILI, STLNEWS.co – Maski iha situasaun pandemia Covid-19 nian laran, maibe benefisiariu sira neebe forma simu aihan sesta bazika, lakumpri distasiamentu sosial hanesan fase liman no uza maskra.

Tuir Xefe Aldeia 05, suku Fatuhada, Postu Administrativu Dom. Aleixo, Munisipiu Dili, Egidio F.Ximenes hatete, iha situasaun pandemia Covid-19 ida nee, hanesan moras mundial ida neebe mak mundu tomak infrenta inklui Timor Leste, maibe komunidade sira nee koalia mos sira nafatin la kumpri, maibe sira tama mai foti sasan, tenke fase liman, antes tama iha loja laran foti sira nian sasan.

“Agora ita boot sira haree rasik, balun forma no tuur nee ba la tuir ona regras, depois ita koalia fo hanoin sira mos, ita hatene ona ita Timor nee, tanba desde ohin dader kedas hau koalia ba sira, hau rasik husu ba sira katak, ita boot sira tenke kumpri distasiamentu sosial, uza maskra, tama mai laran tenke fase liman, hodi mai foti sasan. Hau hanoin suku Fatuhada nee Aldeia 4 simu tiha ona, hela Aldeia hau nian 05 ohin foin simu, maibe parte polisia too agora seidauk mai iha fatin ida nee,” dehan Egidio ba STL iha fatin distribuisaun sesta bazika iha supermerkadu W-Four Timor Plaza Comoro, Dili, Kinta (25/02/2021).

Nunee mos, vogais sesta bazika husi MTCI, Salvador D.C. Pereira, hatete, konaba benifisiariu sira la kumpri regras distansiamentu nee, sira sempre fo hatene ba autoridade,tanba sira sempre iha koordenasaun nafatin, ho Ministeriu Saude, nomos fo hand sanitizer, para benefisiariu sira uza fase liman.

“Entaun parte ministeriu nafatin halo koordenasaun, maibe depois de informasaun nee ita espalha ba komunidade sira, tanba ami fo hanoin nafatin ba ita nian komunidade sira, oinsa mak uza maskra, ida nee ami fo hatene autoridade sira, nomos membru OPS, para nunee bele halo kontrolu ita nian benefisiariu sira,” dehan nia.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here