Benifisiariu Kestiona Kompania Hetan Lukru

Foto Ilustrasaun: GSE

DILI, STLNEWS.co – Benifisiariu neebe hetan direitu ba sesta bazika, kestiona konaba presu sasan, tanba sira konsidera kompaniahetan liu lukru duke povu.

Lamentasaun nee, hatoo husi benifisiariu, Francisca dos Santos husi aldeia Likarapoma, Suku Bairo-Pite ba STL, iha fatin distribuisaun sesta bazika iha area Hudi Laran, Dili, Kinta (18/02/2021).

Nia dehan, sesta bazika nee kada ema ida $50, xefe suku koalia ba sira, sira nain rasik mak foti, tanba saida too iha laran, foti sasan la hanesan ho saida mak xefe suku sira koalia sira hakarak foti sasan neebe mak diak, Corona seidauk halo komunidade sira mate, maibe sasan balun hanesan fore metan balun fohuk.

“Sasan fohuk nunee labele fo ami, tanba estadu mak promete mai ami, tanba ami seidauk ezije estadu, sasan neebe mak fohuk nee hanesan fore metan, depois fore keli sira nee ami la gosta han ida, tanba ami hakarak sasan neebe mak fo mai ami nee, ami rasik mak tama too iha laran mak foti rasik, imi dehan sasan nee imi nian,no imi tama iha laran sasan saida mak imi hakarak foti rasik, nusa mak sasan hirak nee sira mak foti fali fo ita, nusa mak sira mak foti fali sasan nee ba ami la hanesan ho valor osan neebe mak ita nian governu fo mai ami, se ami foti sasan hanesan nee diak ba kompania deit, ami haree katak, kompania mak hetan lukru liu fali ami povu kiik sira,” dehan Francisca ba STL iha fatin distribuisaun sesta bazika husi Kompania Celena iha area hudi Laran Dili Kinta (18/02/2021).

Iha fatin hanesan, Xefe Aldeia Likarapoma, Suku Bairo-Pite, Postu Administrativu Dom Alexo, Munisipiu Dili, Antonio Soares, hatete, konaba presu sasan, hanesan autoridade lokal, ida nee benifisiariu sira nian lamentasaun ou preokupasaun ba folin sasan neebe sira foti, tanba hanesan autoridade lokal sempre akompania deit sira, tanba konaba presu nee husi governu ho kompania mak bele hatene.

“Los duni katak, ita nian sasan balun ami haree balun fohuk, maibe tanba produtu lokal ita nian, maibe sekarik benifisiariu sira lakohi foti sasan neebe fohuk nee, sira tenke foti fali buat seluk, para bele kompleta sasan sira nee, ezemplu ema nain 10, sasan mos bele foti lori ba, tanba bainhira sasan seidauk kompletu sira tenke ba fo hatene iha kasir, para bele foti sasan sira nee, segundu ema nain 8, ohin ita nian benifisiariu sira mos kestiona katak, nain tolu mak simu, lima la simu ida,” nia dehan.

Bainhira STL tenta atu halo intervista ho responsabilidade kompania Celena, maibe la konsege tanba laiha fatin no ba tuir enkontru iha MTCI.

Aleinde nee tenta atu kinfirma ho parte MTCI, maibe okupadu atende benifisiariu sira, tuir observasaun STL iha terenu, maske dadaun nee iha faze EE ba Covid-19, maibe benifisiariu sira forma la tuir regras neebe iha no balun la uza maskra.*

Reportajen: JacintaSequeira/Madalena Horta
Editor: Ekipa STL

LEAVE A REPLY

Please enter your comment!
Please enter your name here