DILI, STLNEWS.co – Komunidade barak mak hela iha mota laran, nee laos hela permanente, maibe hela provizoriu hodi buka moris susenta familia uma laran.
Maski Autoridade Protesaun Sivil (APC) alerta beibeik ba komunidade sira atu hadook aan husu fatin risku ba dezastre naturais, maibe komunidade balun kontinua konstrui uma iha mota ibun hodi hela, tanba laos uma permanente, maibe hela provizoriu.
“Inan aman sira neebe pineira rai henek iha mota laran nee laos mai hela permanente, lae, ita haree sira mai buka moris mota laran liu husi pineira rai henek hodi hetan osan susenta familia uma laran,” hatete Komunidade Samuel dos Santos STL iha Mota Komoro, Dili, Domingu (19/11/2023).
Nia dehan, buka moris iha mota laran nee hodi hetan osan selu labarik sira nia eskola no sustenta familia uma laran.
“Sira uma iha, maibe ita lao dook, uma mak iha foho leten hotu, no balun hela ho familia mak mai pineira rai henek, tanba nee sira halo uma provizoriu iha mota laran deit,” nia informa.
Iha fatin hanesan, Komunidade Domingos Fatima uma neebe lokaliza iha mota laran, konstrui husi komunidade balun neebe pineira rai henek hodi satan udan no loron manas.
Nia deklara, los duni uluk ema barak halo uma iha mota laran no foin daudaun akontese dezastre naturais iha dia 4 Abril, ema barak sai vitima ba dezastre naturais.
Nia esplika, sira hela iha nee iha idak-idak iha uma, ami halo uma iha nee laos hela permanente, maibe uma ida nee atu buka moris liu husi pineira rai henek no komunidade barak hela iha area neebe risku, tanba buka moris hodi sustenta familia uma laran.
“Ita uma iha foho leten, maibe ami mai hela iha nee laos hela metin, maibe buka moris, tanba lao dook, entaun ami hela iha nee hodi dader pineira rai henek,” nia afirma.
(jen)
