Deputada FRETILIN Husu Ezekuta OR Labele Haree Koor

DILI, STLNEWS.co – Deputada Bankada FRETILIN, Helena Martins husu governu atu ezekuta Orsamentu Retifikativu (OR), labele haree ba koor partidu hodi boikota malu. Oinsa atu lalais halo ezekusaun hodi selu ema sira catering, pessoal saude, pessoal limpeza sira, no pesoal sira neebe servisu iha lina frente inklui mos jornalista sira balu seidauk simu osan han.

Husu ba governu oinsa atu halo jestaun diak ba orsamentu neebe foin lalais aprova i presiza iha lina koordenasaun diak nafatin, hodi halao servisu atu labele haree ba koor partidu.

“Mezmu ita iha partidu ketak-ketak, maibe ita servisu hodi servi povu, labele halo fali boikota ba malu. Hodi dehan iha ministeriu leten no okos laiha lina koordenasaun ba malu. Ida nee ita sente ladun seguru ba iha dezenvolvimentu, ba atende komunidade. Neebe ami fo hanoin ba governu atu halo jestaun diak ho koordenasaun diak,” katak Deputada Helena iha sesaun plenaria, Segunda (10/05/2021) iha PN.

Nia dehan, OR neebe aprova, presiza atu halo jestaun diak, hodi atende ba ema sira neebe seidauk halo pagamentu no mos mos atende diak ba komunidade sira, atu oinsa dezenvolvimentu nee bele atende duni ba publiku nia nesesidade ho diak.

Nunee mos Deputada Bankada CNRT, Fernanda Lay hatete nia hetan pessoal balu neebe servisu iha lina frente hatoo preokupasaun katak, iha lista nia asina fulan 3 nian, maibe simu fali osan fulan ida deit.”

“Rona ida nee hau hakfodak, ida neebe bele akontese, tanba nee ami husu governu atu fo esplikasaun ba mai, tanba lina frente nee sempre sai problema desde inisiu Covid-19 tama iha Timor,” nia lamenta.

Entretantu hatan ba kestaun nee, Prezidente Parlamentu Nasional Aniceto Guterres hatete, ho preokupasaun sira nee hein parte governu semana oin mai iha plenaria PN mak responde dala ida.*

Reportajen: Guilhermina Franco/Domingas S./Madalena H.
Editora: Domingas Gomes

LEAVE A REPLY

Please enter your comment!
Please enter your name here