Dezembru Debate OJE 2021

Primeiru Ministru (PM) Taur Matan Ruak (Foto: Gabineti Primeiru Ministru)

DILI, STLNEWS.co – Primeiru Ministru Taur Matan Ruak informa ba Prezidente Republika katak, iha loron 1 fulan Dezembru tinan 2020, governu ho deputadu sira sei debate Orsamentu Jeral Estadu (OJE) 2021, iha Parlamentu Nasional.

Dehan Xefe Governu ba Jornalista sira, bainhira remata enkontru ho Xefe Estadu, iha Palasiu Prezidente Nicolau Lobato, Bairru Pite, Dili, Tersa (17/11/2020).

“Prezidente Republika atu sai, tanba nee hau husu hasoru hodi informa atividade oin tolu ba PR, ida mak OJE 2021 neebe dadaun nee iha audensia publika, no kalendariu ba diskusaun orsamentu 2021 neebe Parlamentu Nasional fo hatene ba governu katak, hahu iha loron 1 fulan Dezembru dabate jeneralidade no loron 2 too 4 fulan Dezembru 2021 ita tama ba debate iha espesialidade,” hatete PM Taur.

Iha hasoru malu ho Prezidente Republika nee, Primeiru Ministru mos hatoo mos hatoo kona ba situasaun seguransa rai laran neebe lao diak, maski iha problema kiik balun neebe sei akontese ba Prezidente Republika.
“Ita kontinua fo orientasaun ba Polisia Nasional Timor Leste, para bele kontrola diak liu tan situasaun seguransa iha rai laran,” dehan Xefe Governu.

Aleinde informa OJE 2021, situasaun rai laran ba Prezidente Republika, Xefe Governu mos informa programa sesta bazika neebe governu implementa ona ba povu iha teretoriu Timor laran tomak.

“Foin dadaun iha Novembru nia laran halo hela projetu pilotu para haree, nunee bele implementa ba munisipiu hotu inklui mos Dili,” hatete Taur.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here