DILI, STLNEWS.co – Durante Covid-19 lori dezastre boot ba grupu industria barak hodi hapara sira nia atividade, tanba laiha rendimentu no agora atividade lao normal fali.
Kestaun nee fo sai husi Koordenador Grupu Arte Jenatu, Maria da Costa Cabral, ba STL iha Tasi Tolu bainhira partisipa feira ba selebrasaun loron FALINTIL neebe monu iha loron 20 fulan Agostu no konsulta Popular 30 fulan Agostu, Tersa nee(02/08 /2022).
“Hanesan koordenador hau hakarak husu ba grupu maluk sira neebe mak durante Covid-19 atividade la lao atu ativa fali, ho nunee bele fo servisu ba ita nia aan no mos maluk sira seluk neebe hamahan aan iha grupu nia laran,” dehan nia.
Nia afirma liu tan, iha tempu Covid-19 Grupu Arte Jenatu Maubara nee mos hasoru problema, tanba laiha rendimentu, maibe hafoin livre husi Covid-19 grupu nee kontinua nafatin nia atividade.
Iha fatin hanesan, Justinha Martins (membru grupu) hatutan, uluk seidauk Covid-19 iha Munisipiu Likisa liu-liu Postu Maubara, ema hotu moris ho industria kiik, homan no balun soru tais, maibe hafoin de Covid-19 mosu, halo grupu barak mak fahe malu (bubar), tanba sira nia osan kaas uza ba han hotu.
(mad)
