Ekonomia Monu, Impaktu Husi Covid no Inserteza Politiku

Direktur Ezekutivu Luta Hamutuk (LH) Jose da Costa. (Foto: STL/Santina Castro)

DILI, STLNEWS.co – Organizasaun Soiedade sivil Luta Hamutuk (LH) Direktur Ezekutivu Jose da Costa hatete, too ohin loron ekonomia hakdasak no monu, tanba iha problema rua, inserteza politiku no pandemia Covid-19.

Direktur Ezekutivu Luta Hamutuk (LH) Jose da Costa hatete, tuir sira nia observasaun ekonomia rai laran monu, no hakdasak tebes, tanba pandemia Covid-19 nee, maibe hahu mos ho inserteza politika neebe maka mosu, durante tinan rua husi 2017, husi neeba kedas progresu dezenvolvimentu lalao.

“Ita hare katak TL nee kuaze dependensia ba OJE, maibe OJE lao hakdasak nafatin, governasaun sira utiliza nafatin Duodesimu entaun susar tebes atu hakbiit ekonomia rai laran, tanba laiha kampu traballu,” dehan nia ba STL iha nia knaar fatin Farol Sesta, (09/10/2020).

Nia hatutan, ekonomia monu iha situasaun Covid-19 moras mundial neebe maka iha, inklui afeta mos iha Timor Leste. Nunee nudar nasaun ida, tenki asegura aan, tanba nee desidi estadu emerjensia atu bele limita sosiedade sira hotu nia movimentu.

“Ita hare atividade ekonomia sira hotu hahu husi EE primeiru no segundu nee ita hapara, nee fo mos impaktu ba ita nia agrikola sira makas ema nia modo tahan sai dodok, no ema sira neebe tetu nuu maran, nuu sai aat hotu tanba sira labele transporta tanba iha hela situasaun EE.

Nia dehan, kuaze movimentu ekonomia nee mate, loja sira taka transporte publiku sira lahalo movimentu no ema mos lahalo movimentu, entaun ida nee afeta tebes ba iha ekonomia bazika.

To mai agora, ita nia ekonomia tuir relatoriu husi organizasaun internasional sira publika katak Timor Leste nee nasaun ida neebe kiak liu. Ita kiak liu tanba, ita lapreparadu, kuaze ita iha tinan tolu, governu sira halimar liu ho politika hodi joga malu, no estabilisade politika nee laiha investimentu dezenvolvimentu industria iha rai laran laiha, entaun lakonsege iha kbiit no forsa atu bele hasoru situasaun nee liuliu moras Global neebe maka iha.

Ate agora bele dehan, ita hare husi empreza sira agora bangkrut, se bainhira governasaun lao diak, projetu iha sira bele fo hanesan servisu temporaria maibe bele fo ema servisu halo estrada halo uma, no servisu seluk neebe maka bele hakbiit sira nia ekonomia maibe ida nee laiha.

No ohin loron iha mos projetu 143 neebe maka sai mos indikador ida, empreza barak maka kuaze monu hakdasak tanba durante tinan tolu ona larezolve sira nia problema.

Hare husi buat hirak nee ita bele dehan katak ita nia ekonomia nee hakdasak, tanba loja barak mos taka no mos bobot barak maka sasan menus, no mos iha loja barak neebe hasai sira nia traballador, tanba kbiit atu selu nee laiha, tanba laiha ema atu hola sasan, maibe osan mos laiha ema atu hola sasan.

Reportajen: Santina Castro
Editor: Ekipa STL

LEAVE A REPLY

Please enter your comment!
Please enter your name here