Emprezariu Aproveita Covid Hasae Folin Fos

DILI, STLNEWS.co – Serka sanitaria no konfinamentu atu salva povu husi pandemia Covid-19, maibe governu la kontrola folin sasan iha merkadu, fo espasu ba kompania aproveita Covid-19 hodi hasae presu foos, nunee fo impaktu ba povu kbiit laek.

Tuir reprezentante povu iha una fukun Parlamentu Nasional, Deputadu Noe da Silva hatete, estabelese serka no konfinamentu, maibe governu la kontrola presu sasan iha merkadu liu liu fos folin neebe sae makas iha Munisipiu hodi fo inpaktu ba povu kbiit laek sira, fos kg 25 sae 14 dollar 50 cent, no 30 kg sae ba 15 dollar 50 cent, ida nee bele fo impaktu ba povu kbiit laek atu sosa.

“Husu ba governu atu nafatin kontrola presu sasan liu liu foos nia folin iha merkadu, atu nunee labele fo impaktu ba povu kiik neebe laiha osan atu sosa, tanba moras mundial ida nee halo ema labele sai ba buka osan,” dehan deputadu Noe.

Nia afirma governu tenke kontrola presu iha baze selae emprezariu sira aproveita situsaun defisil ida nee hodi hetan lukru tan nee sira tenke hasae fos folin iha merkadu, tanba governu ladun fo atensaun hodi kontrola sasan folin iha supermerkadu no mini mini merkadu (mini market).

Iha fatin haneasan Deputadu Antonio da Conceição hatutan, knaar governu nian maka atu halo kontrolu ba presu sasan iha merkadu, ho nunee labele fo implikasaun ba povu kiik sira atu sosa.

“Ho situasaun serka ida nee, governu labele kontrola deit presu sasan iha sidade Dili, maibe tenke ba too iha munisipiu sira, tanba presu sasan kuandu sae laos iha Dili deit, maibe iha munisipiu mos, ho tempu ida agora kompania sira bele uza mos oportunidade halimar folin sasan iha Munisipiu,” dehan deputadu nee.*

Reportajen: Madalena Horta
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

MEJD Planu Sei Harii Tan Eskola

DILI, STLNEWS.co - Ministru Edukasaun, Juventude, no Desportu (MEJD), Armindo Maia hateten, tinan nee governu liu husi MEJD sei harii tan eskola hamutuk 250...

Aimoruk La Too, Komunidade Buruma Balun La Vasina

BAUCAU, STLNEWS.co - Komunidade iha Suku Buruma antusiasmu tebes atu simu vasina kontra Covid-19, maibe aimoruk la sufisiente, nunee balun deit mak simu vasina...

Reativa Eskola Iha Baucau Sei Marka Audensia Ho MEJD

BAUCAU, STLNEWS.co - Diretor Servisu Munisipal Edukasaun, Juventude, no Desportu (SMEJD) Baucau, Segunda semana oin sei marka audensia ho Ministeriu Edukasaun, Juventude, no Despostu...
%d bloggers like this: